Administrata Trump po përgatitet për një hakmarrje të mundshme nga Irani, me 48 orët e ardhshme të cilat do të jenë veçanërisht shqetësuese, thanë për NBC News dy burime nga Pentagoni dhe një zyrtar i lartë i Shtëpisë së Bardhë.
Ende nuk dihet nëse Irani do të synojë objektet amerikane jashtë vendit, brenda vendit apo të dyja, në përgjigje të sulmeve amerikane në infrastrukturën e tij bërthamore, thanë burimet.
Bazat ushtarake amerikane jashtë vendit kanë qenë në gatishmëri të lartë për muaj të tërë, por burime të Shtëpisë së Bardhë thonë se alarmi është rritur që kur Izraeli nisi veprime ushtarake kundër Iranit më 13 qershor.
Nga ana tjetër, Ministri i Jashtëm iranian Abbas Araghchi deklaroi se Shtetet e Bashkuara shkelën rëndë ligjin ndërkombëtar dhe regjimin e mospërhapjes bërthamore duke sulmuar objektet paqësore të programit bërthamor.
“Ngjarjet e këtij mëngjesi janë të skandalshme dhe do të kenë pasoja afatgjata. Çdo anëtar i OKB-së duhet të alarmohet nga kjo sjellje jashtëzakonisht e rrezikshme, e paligjshme dhe kriminale”, shkroi Araghchi në rrjetet sociale X.
Natën e 22 qershorit, ushtria amerikane sulmoi tre vende kyçe të programit bërthamor iranian – Fordow, Natanz dhe Isfahan. Fordow u sulmua nga bombarduesit B-2, të cilët hodhën gjashtë bomba kundër bunkerëve. Vendet në Natanz dhe Isfahan u sulmuan nga nëndetëset me 30 raketa Tomahawk.
Presidenti i SHBA-së, Donald Trump, tha se të gjitha objektet ishin shkatërruar dhe i bëri thirrje Teheranit të negociojë. Autoritetet iraniane konfirmuan sulmet ndaj objekteve dhe thanë, në veçanti, se objekti Fordow ishte evakuuar në pritje të sulmeve të mundshme. Ende nuk ka konfirmim të pavarur për shkallën e shkatërrimit në Iran pas sulmit.
