Shkruan: Drizan ShALA
Bastisja e kryer nga Policia e Kosovës, në bashkëpunim me AKI-në, KFOR-in dhe EULEX-in në fshatin Vallaq të Zveçanit, ekspozoi një realitet alarmues dhe të papranueshëm: në objektin e lidhur me politikanin serb Aleksandar Arsenijeviq u zbulua një arsenal armësh të rënda – përfshirë zolla (raketahedhës dore), granata, fishekë dhe pajisje luftarake.
Ky nuk është një rast i izoluar i posedimit të paligjshëm të armëve. Është dëshmi konkrete e ekzistencës së një strukture operative të inteligjencës serbe, me prirje destabilizuese, e vendosur brenda një konteksti politik dhe etnik të ndjeshëm në veri të Kosovës. Këtë paralajmërim e kemi dhënë më herët – në mënyrë të vazhdueshme dhe të dokumentuar – dhe sot, faktet në terren e vërtetojnë qartë: Aleksandar Arsenijeviq nuk është thjesht një figurë politike, por punkt aktiv i një rrjeti të fshehtë inteligjent, me funksione të mbikëqyrjes, logjistikës dhe furnizimit për grupe të armatosura.
Elementët thelbësorë negativë nga ky rast:
Politizimi i krimit të organizuar
Përdorimi i një figure politike si mbulesë për magazinim armësh tregon bashkëpunim të strukturuar mes grupeve kriminale dhe agjenturave të inteligjencës.
Akt i drejtpërdrejtë kundër sigurisë kombëtare
Prania e një arsenali në një zonë etnike të tensionuar përbën rrezik të lartë për provokim dhe përshkallëzim të konflikteve ndëretnike.
Punkt inteligjent serb i konfirmuar:
Objekti duhet trajtuar si pikë e verifikuar operative e shërbimeve serbe BIA/VOA – me funksione të planifikuara për destabilizim.
Veriu i Kosovës si hapësirë për operacione ilegale të serbisë:
Ky rast e konfirmon: veriu është shndërruar në një zonë të infiltruar thellë nga struktura paralele dhe rrjete paramilitare të ndërlidhura me inteligjencën serbe.
