Sipas raportimeve të fundit nga terreni, Irani ka qëlluar me të paktën gjashtë raketa drejt bazës së rëndësishme ushtarake amerikane në Doha të Katarit dhe në Irak, si hakmarrje ndaj sulmeve amerikane ditët e fundit ndaj tre lokacioneve bërthamore iraniane (Fordow, Natanz, Isfahan).
Fluturimet mbi Doha janë ndërprerë menjëherë, ndërsa janë aktivizuar edhe raketat mbrojtëse për të interceptuar sulmet . OFF Sipas burimeve si Reuters dhe BBC, qeveritë amerikane dhe britanike kanë lëshuar paralajmërime për qytetarët në Katar, duke i këshilluar të qëndrojnë brenda derisa situata të qetësohet . Gjithashtu, edhe Katar ka ndërmarrë veprime parandaluese duke mbyllur hapësirën ajrore përkohësisht, si masë sigurie. Ndërkohë, Shtetet e Bashkuara kanë forcuar praninë e tyre ushtarake në rajon dhe janë në gjendje gatishmërie të lartë.
Katari: Asnjë viktimë nga sulmi ndaj bazës amerikane
Zëdhënësi i ministrit të Jashtëm të Katarit, Majed al-Ansari, tha se asnjë viktimë nuk është regjistruar nga sulmet iraniane në bazën ajrore Al Udeid. Ai tha se Katari dënon sulmin.
“U ndërmorën të gjitha hapat e nevojshëm për të garantuar sigurinë e personelit në bazë, duke përfshirë anëtarët e Forcave të Armatosura të Katarit, forcat miqësore dhe të tjerë. Ne konfirmojmë se asnjë lëndim ose viktimë njerëzore nuk rezultoi nga sulmi“, tha ai. Zëdhënësi shtoi se Katari rezervon të drejtën të përgjigjet “në një mënyrë ekuivalente me natyrën dhe shkallën e këtij agresioni të pacipë”.
“Ne e konsiderojmë këtë një shkelje flagrante të sovranitetit të Shtetit të Katarit, hapësirës së tij ajrore, ligjit ndërkombëtar dhe kartës së Kombeve të Bashkuara“, theksoi ai.
Irani sulmon me raketa bazat e amerikane në Katar dhe Irak
Irani ka nisur një sulm me raketa në bazat ajrore amerikane në Katar dhe Irak në përgjigje të bombardimeve të SHBA në vendet e tij bërthamore. Njoftimi u dha në televizionin shtetëror, ndërsa mbishkrimi në ekran e quajti atë “një përgjigje të fuqishme dhe të suksesshme nga forcat e armatosura të Iranit ndaj agresionit të Amerikës”.
Në një deklaratë, Garda Revolucionare Islamike e Iranit tha se mesazhi i Iranit për Shtëpinë e Bardhë dhe aleatët e saj është “i qartë”. “Irani nuk do të lërë asnjë sulm ndaj integritetit të tij territorial, sovranitetit dhe sigurisë kombëtare pa përgjigje në asnjë rrethanë“, thuhet në deklaratë.
Sulmi erdhi menjëherë pasi Katari mbylli hapësirën e tij ajrore si një masë paraprake mes kërcënimeve nga Irani.
Në një reagim, Shtëpia e Bardhë dhe Pentagoni thanë se janë të vetëdijshëm dhe se po monitorojnë nga afër kërcënimet. Në Uashington, Donald Trump po merr pjesë në një takim të Këshillit të Sigurisë Kombëtare.
Irani tha se sulmi i tij me raketa në bazën ajrore Al Udeid në Katar përputhej me numrin e bombave të hedhura nga Shtetet e Bashkuara në vendet e saj bërthamore këtë fundjavë, duke sinjalizuar dëshirën e tij të mundshme për të depërshkallëzuar. Irani e bëri njoftimin përmes një deklarate nga Këshilli i tij i Lartë i Sigurisë Kombëtare pas sulmit, për të cilin Katari tha se nuk shkaktoi lëndime. Irani tha gjithashtu se kishte në shënjestër bazën sepse ishte jashtë zonave të populluara.
Al Udeid është një bazë e madhe jashtë kryeqytetit të Katarit dhe është shtëpia e selisë së Komandës Qendrore të SHBA-së për të gjitha operacionet e saj ajrore në Lindjen e Mesme. Personeli ushtarak britanik gjithashtu shërben me rotacion në bazë./rtsh
