Komuna e Vushtrrisë në bashkëpunim me organizatën ndërkombëtare Islamic Relief Worldwide bëri përurimin e aparatit të mamografisë në Qendrën Kryesore të Mjekësisë Familjare në këtë qytet, një projekt që synon të mundësojë diagnostikimin e hershëm të kancerit të gjirit tek gratë.
Kryetari i Komunës së Vushtrrisë, Ferit Idrizi, tha se ky projekt ka rëndësi të veçantë për shëndetin e grave vushtrriase.
“Sot, bashkë me Islamic Relief, e përuruam aparatin e mamografisë, i cili është i një rëndësie të veçantë për diagnostikimin e kancerit të gjirit në faza të hershme. Ky aparat i ka munguar shumë pacienteve dhe ka qenë shumë problematike për të shkuar në spitale apo qendra të tjera. Tani e tutje, të gjitha shërbimet do të ofrohen këtu”, tha Idrizi.
Në këtë ceremoni ishte e pranishme edhe Selvete Sholla, profesoreshë në pension dhe e mbijetuar e kancerit të gjirit, e cila tha se gratë e kësaj komune nuk do të maltretohen duke shkuar në qytete të tjera për të bërë mamografinë.
“Ka qenë shumë i nevojshëm për qytetin e Vushtrrisë. Unë i falënderohem edhe Zotit që e kam tejkaluar këtë sprovë dhe për momentin jam shumë mirë. Më vjen mirë që për gratë tona tash e tutje e kemi në Vushtrri aparatin, që të mos maltretohemi duke shkuar në qytete të tjera”, tha ajo.
Pjesë e ceremonisë ishin edhe përfaqësuesit e Islamic Relief, përfshirë themeluesin e organizatës, Hany El Banna dhe drejtorin për Kosovë dhe Shqipëri, Mohamed Soliman.
El Banna u shpreh se misioni i tyre është të jenë gjithmonë pranë njerëzve në nevojë.
“Ne jemi këtu për t’ju shërbyer, sepse Allahu na dha mundësinë të jemi shërbëtorët tuaj. Kjo është puna jonë: të jemi me ju gjatë gjithë kohës, edhe nëse nuk kemi burime. Sepse dashuria mes jush dhe nesh na bën të qëndrojmë këtu dhe të jemi shërbëtorët e njerëzve. Ne jemi shërbëtorët e njerëzve”, tha ai.
Ndërsa, drejtori i Islamic Relief për Kosovë dhe Shqipëri, Mohamed Soliman, vlerësoi bashkëpunimin e hershëm me Vushtrrinë dhe theksoi rëndësinë e projektit.
“Kemi këtë mamograf në qytetin e Vushtrrisë. Më kujtohet që puna me Vushtrrinë është shumë e veçantë për ne, sepse ishte qyteti i parë me të cilin filluam punën, pastaj erdhën edhe qytete të tjera dhe përfshiu edhe qeveria”.
“Sot, falë Zotit, kemi një projekt shumë të veçantë të mamografisë dhe shpresojmë që do të bashkëpunojmë në kontrollin bazë për gratë që vuajnë në heshtje. Ka një ngjarje shumë të veçantë që e shpallëm në prani të themeluesit tonë, Hani El Banna, i cili themeloi projektin e mamografisë në nivel global në vitin 1984. Sot, falë Zotit, kemi më shumë se 50 njësi mamografie në mbarë botën. Dr. Hani El Banna ishte i pari që erdhi në Kosovë në kohë lufte dhe ndihmoi të gjithë njerëzit në nevojë anembanë botës, duke mbështetur qytetarët e Kosovës në atë kohë të vështirë. Prandaj, është shumë e veçantë për ne që e kemi Hani mes nesh sot”, tha ai.
