Deputetja e LDK-së, Hykmete Bajrami, ka përshëndetur vendimin e Gjykatës Komerciale të Kosovës, e cila më 18 qershor 2025 miratoi kërkesën e një biznesi për pezullimin e përjashtimit nga shërbimi universal i energjisë elektrike. Ajo e konsideron këtë vendim si hapin e parë drejt ndalimit të padrejtësive në sektorin energjetik dhe si një precedent të rëndësishëm që vë në pikëpyetje gjithë procesin e imponuar nga ZRrE për kalimin e bizneseve në tregun e lirë.
“Edhe pse bëhet fjalë për një rast individual, ky vendim krijon precedent të rëndësishëm duke e vënë në pikëpyetje gjithë procesin e imponuar nga ZRrE për kalimin në tregun e ashtuquajtur të hapur, i cili vetëm si i tillë nuk ekziston,” deklaroi Bajrami.
Ajo kritikoi ZRrE për reagimin ndaj këtij vendimi duke e cilësuar atë si arrogant dhe jopërgjegjës. Sipas saj, vendimi nuk është thjesht teknik apo individual, por një tregues i qartë i një procesi të dështuar dhe të papërgatitur, i mbështetur nga vetë Qeveria e Kosovës.
Deputetja kërkoi nga Gjykata Komerciale që të trajtojë me prioritet edhe paditë e tjera të deponuara nga shoqatat dhe bizneset, të cilat po kërkojnë një periudhë tranzicioni dhe mbështetje institucionale. Po ashtu, ajo theksoi nevojën që kjo gjykatë të shqyrtojë urgjentisht edhe vendimin për rritjen e çmimit të energjisë për konsumatorët familjarë.
Në fund, Bajrami bëri thirrje për hetime të hollësishme nga Prokuroria Speciale lidhur me atë që ajo e quajti “mafia energjetike”, përfshirë mënyrën e menaxhimit të importeve dhe eksporteve të energjisë, tenderët në KEK dhe ndikimin e grupeve të interesit në politikat publike.
“Nuk mund të kemi liberalizim tregu pa konkurrencë reale, pa transparencë dhe pa mbrojtje të konsumatorit. Nuk mund të kemi institucione që e përdorin ‘tregun e lirë’ si justifikim për rritjen e çmimeve dhe për t’ju shërbyer interesave të tregtarëve të energjisë,” përfundoi ajo. /Kosovatimes/
