Dhoma e Tregtisë dhe Industrisë Kosovë ka mirëpritur vendimin e Gjykatës Komerciale në Prishtinë, e cila ka pezulluar njoftimin e Zyrës së Rregullatorit për Energji (ZRRE) që detyronte bizneset të kalonin në tregun e lirë të energjisë elektrike.
Ky vendim, sipas Dhomës, konfirmon edhe një herë shqetësimet e ngritura më parë se veprimi i ZRRE-së ishte i kundërligjshëm, pasi u mor pa konsultime dhe analiza paraprake duke detyruar mbi 1300 kompani të dalin në tregun e hapur të energjisë, ndërkohë që në këtë treg ekziston vetëm një ofertues i vetëm për furnizim.
“Ky proces ka qenë i njëanshëm dhe i pakoordinuar, me pasoja të drejtpërdrejta për stabilitetin ekonomik dhe funksionimin e lirë të bizneseve”, theksohet në reagimin e Dhomës.
Dhoma e Tregtisë dhe Industrisë Kosovë ishte institucioni i parë që, në emër të bizneseve, ka ushtruar ankesë në Gjykatën Themelore të Prishtinës kundër këtij vendimi të ZRRE-së. Aktualisht, janë dhjetëra kompani të tjera që kanë ndjekur të njëjtën rrugë ligjore për të kundërshtuar këtë masë.
Dhoma thekson nevojën për një proces të drejtë, transparent dhe të mbështetur në konkurrencë reale, ku vendimet që prekin sektorin privat të bazohen në analiza gjithëpërfshirëse dhe konsultime të rregullta me përfaqësuesit e biznesit.
