Gjykata pezullon vendimin e ZRrE-së për tregun e lirë të energjisë, LBK kërkon anulimin e plotë

Lidhja e Bizneseve të Kosovës (LBK) ka bërë të ditur se Gjykata Komerciale në Prishtinë ka marrë vendim për pezullimin e njoftimit të Zyrës së Rregullatorit për Energji (ZRrE), që parashihte daljen e detyrueshme të bizneseve në tregun e lirë të energjisë elektrike.Duke e cilësuar këtë si një hap të rëndësishëm për mbrojtjen e ekonomisë vendore, LBK tani kërkon zyrtarisht nga ZRrE që të pezullojë në tërësi këtë vendim, dhe të ndalojë çdo veprim të mëtejshëm që mund të dëmtojë funksionimin e bizneseve, veçanërisht në këtë periudhë sfiduese për sektorin privat.“Ky është një vendim i domosdoshëm për të mbrojtur interesin ekonomik të vendit, sidomos kur kemi rënie të eksporteve dhe sfida serioze për prodhuesit vendorë,” thuhet në reagimin e LBK-së.Organizata bën të ditur se nuk është kundër liberalizimit të tregut të energjisë, por thekson se ky proces duhet të zbatohet me një plan të qartë dhe kohë të mjaftueshme për përgatitje, duke garantuar stabilitet për bizneset dhe qytetarët e Kosovës.Në të njëjtën kohë, LBK shpreh gatishmërinë për bashkëpunim të ngushtë me ZRrE-në dhe institucionet e tjera, me qëllim që të hartohet një fazë tranzitore e drejtë, e planifikuar mirë dhe e zbatueshme, që mundëson kalim të qëndrueshëm në tregun e lirë të energjisë.Lidhja e Bizneseve të Kosovës dhe Shoqata e Prodhuesve, që vepron në kuadër të saj, kanë ngritur vazhdimisht shqetësimet për ndikimin negativ të këtij vendimi, duke kërkuar shfuqizimin e tij si të nxituar dhe të dëmshëm për bizneset dhe prodhuesit lokalë. /Kosovatimes/