Koalicioni i OJQ-ve për Mbrojtjen e Fëmijëve – KOMF, në bashkëpunim me UNICEF në Kosovë, mbajti një konferencë për prezantimin e Vlerësimit të sistemit të drejtësisë për fëmijët në konflikt me ligjin, me fokus të veçantë në zbatimin e masave të diversitetit.
Në panelin e konferencës morën pjesë Ministrja e Drejtësisë në detyrë, znj. Albulena Haxhiu, Prokurorja në Zyrën e Kryeprokurorit të Shtetit, znj. Laura Pula, si dhe përfaqësuesi i UNICEF-it në Kosovë, z. Dren Rexha.
Qëllimi i konferencës ishte të paraqesë gjetjet kryesore të vlerësimit dhe të nxisë diskutim institucional mbi sfidat dhe rekomandimet për përmirësimin e sistemit të drejtësisë për të mitur në përputhje me standardet ndërkombëtare për të drejtat e fëmijës.
Vlerësimi tregon se megjithëse sistemi ligjor për të mitur në Kosovë është në përputhje të konsiderueshme me standardet ndërkombëtare dhe ofron një bazë të qëndrueshme për zbatimin e masave të diversitetit, zbatimi praktik i këtyre masave mbetet i kufizuar dhe i fragmentuar.
Sipas gjetjeve, ka një tendencë shqetësuese të rënies së përdorimit të masave të diversitetit, gjë që bie ndesh me frymën e Kodit të Drejtësisë për të Mitur. Ndër sfidat e identifikuara janë mospërputhjet mes Prokurorive Themelore, mungesa e qartësisë ligjore dhe moszbatimi i masave të reja të përfshira në Kod.
Në konferencë u theksua se promovimi dhe zbatimi i këtyre masave janë thelbësore për të shmangur ndëshkimin formal penal dhe për të garantuar trajtim më të drejtë e efektiv për të miturit në konflikt me ligjin.
Ky studim u realizua në kuadër të projektit “Mbrojtja e fëmijëve të cenueshëm në Kosovë”, i cili financohet nga Bashkimi Evropian në Kosovë dhe implementohet nga UNICEF në Kosovë në partneritet me KOMF-in.
