Këshilli Prokurorial i Kosovës (KPK) dhe Zyra e Kryeprokurorit të Shtetit (ZKPSH) kanë reaguar ashpër ndaj deklaratave të fundit publike të avokatit Besnik Berisha, duke i cilësuar si të papranueshme, jashtë çdo kuadri ligjor dhe ndërhyrje të drejtpërdrejtë në punën e Prokurorisë së Shtetit.
Në një reagim të përbashkët, KPK dhe ZKPSH theksojnë se deklarimet fyese dhe tendencioze të Berishës përbëjnë një tentim për të cenuar imazhin dhe pavarësinë e sistemit prokurorial në vend, veçanërisht në rastin e arrestimit të zyrtarëve policorë, i cili është aktualisht në trajtim nga organet kompetente.
“Deklarata e avokatit Berisha, në të cilën akuzon prokuroren e çështjes për ‘kryerje të krimit’, është jo vetëm e pabazë, por përbën një sulm të drejtpërdrejtë ndaj punës profesionale dhe integritetit të prokurorëve”, thuhet në reagim.
KPK dhe ZKPSH rikujtojnë se Berisha, në cilësinë e Kryetarit të Odës së Avokatëve të Kosovës, ka përgjegjësi të lartë për të ruajtur etikën profesionale dhe për të mos e përdorur këtë pozitë për sulme personale ndaj institucioneve të drejtësisë.
Dy institucionet u bëjnë thirrje të gjithë aktorëve publikë që të përmbahen nga veprime dhe deklarime që mund të cenojnë pavarësinë dhe profesionalizmin e sistemit të drejtësisë, duke shmangur përdorimin e gjuhës fyese dhe denigruese.
Në përfundim, KPK dhe ZKPSH theksojnë përkushtimin e tyre për të garantuar një sistem prokurorial të pavarur, profesional dhe në shërbim të ligjshmërisë dhe qytetarëve të Republikës së Kosovës. /Kosovatimes/
