Komisioni Qendror i Zgjedhjeve në mbledhjen e sotme ka marrë vendim për emërimin e 216 anëtarëve të Komisioneve Komunale të Zgjedhjeve në 38 komunat e Republikës së Kosovës, të cilët përfaqësojnë subjektet e ndryshme politike.
“Sipas Ligjit Nr. 08/L-288 për Zgjedhjet e Përgjithshme, KKZ administron zgjedhjet brenda komunës përkatëse, nën mbikëqyrjen ekskluzive dhe udhëzimet e KQZ-së, duke garantuar ligjshmëri, legjitimitet dhe efikasitet të procesit zgjedhor”, thotë KQZ-ja.
Tutje, në vazhdim e mbledhjes, KQZ-ja mori vendim për miratimin e planit për edukim dhe informim për Zgjedhjet Lokale 2025.
“Ky plan synon të informojë çdo qytetar me të drejtë vote, pavarësisht moshës, gjinisë, nevojave të veçanta, vendbanimit apo përkatësisë etnike. Gjithashtu, ky plan përfshinë të gjitha aktivitetet për secilën nga fazat e procesit zgjedhor edhe bashkëpunimin me institucionet e ndryshme për të dërguar informacionet, mesazhet për procesin zgjedhor te votuesit dhe te palët e interesit, përmes mjeteve të ndryshme të komunikimit. Për hartimin e këtij plani, janë marrë për bazë kërkesat ligjore, përvojat nga proceset e kaluara zgjedhore dhe rekomandimet e dala prej raporteve, analizave, hulumtimeve dhe dokumenteve specifike pas proceseve të ndryshme zgjedhore”, bëhet e ditur nga KQZ-ja.
Aty, anëtarët u njoftuan edhe për përmbylljen e afatit për partitë politike për deklarim të koalicioneve dhe mospjesëmarrjes në Zgjedhjet Lokale 2025, ku deri më 23 qershor sa ishte afati i hapur për deklarimin e koalicioneve për zgjedhjet e 12 tetorit, janë paraqitur vetëm dy koalicione, ndërsa pesë parti politike janë deklaruar në KQZ se nuk duan të certifikohen për zgjedhjet lokale të vjeshtës.
