Kryetari i Partisë Demokratike të Kosovës, Memli Krasniqi ka pritur në takim përfaqësuesin e posaçëm të Norvegjisë për Ballkanin Perëndimor, Eirik Nestås Mathisen.
Siç ka bërë të ditur vetë kreu i PDK-së, në takim me emisarin kanë diskutuar për zhvillimet e bllokadën politike, e për një marrëveshje përfundimtare ndërmjet Kosovës dhe Serbisë, me njohjen reciproke në qendër të saj.
“Diskutuam për zhvillimet e fundit politike në Kosovë dhe rajon. I shpreha qëndrimet e Partisë Demokratike të Kosovës në raport me shumë tema, përfshirë bllokadën politike dhe nevojën urgjente për një marrëveshje përfundimtare ndërmjet Kosovës dhe Serbisë, me njohjen reciproke në qendër të saj”, shkroi Krasniqi.
Shefi i PDK-së, thotë se një rajon stabil dhe në paqe është parakusht për progresin e qëndrueshëm dhe për realizimin e aspiratave për integrim të plotë në Bashkimin Evropian.
“PDK do të vazhdojë të jetë faktor konstruktiv dhe partner i besueshëm në rrugën euroatlantike të Kosovës”, tha Krasniqi. /Kosovatimes/
