Ministria e Arsimit, Shkencës, Teknologjisë dhe Inovacionit (MAShTI) ka reaguar pas zhvillimeve të fundit në Institutin Albanologjik të Kosovës duke i konsideruar veprimet e fundit të Këshillit Drejtues si të njëanshme dhe në kundërshtim me rregulloren e brendshme të institucionit.
Sipas MAShTI-t, më 20 qershor 2025 është raportuar se Këshilli Drejtues i Institutit ka emëruar një ushtrues detyre të ri për postin e drejtorit të Institutit Albanologjik, por ky vendim është marrë në mungesë të kuorumit të nevojshëm.
“Vendimmarrja e Këshillit kërkon pjesëmarrjen e së paku katër nga pesë anëtarët e tij. Në mbledhjen e mbajtur më 20 qershor ishin të pranishëm vetëm tre, prandaj çdo vendim i marrë në atë seancë është juridikisht i pavlefshëm dhe në kundërshtim me rregulloren në fuqi,” thuhet në reagimin zyrtar të Ministrisë.
MAShTI thekson se institucione të rëndësisë kombëtare si Instituti Albanologjik nuk duhet të shndërrohen në platforma për emërime të paligjshme apo për përfitime personale dhe politike duke nënvizuar rëndësinë e ruajtjes së integritetit shkencor dhe institucional të këtij institucioni.
Sipas Ministrisë, përfaqësuesit e saj në Këshillin Drejtues kanë kërkuar në mënyrë të përsëritur shpalljen e konkursit për drejtor të rregullt, por ky proces është zvarritur për më shumë se një vit dhe konkursi ende nuk është shpallur.
“Ministria e konsideron këtë vonesë të pajustifikueshme dhe, përmes Zyrës së saj Ligjore, do ta trajtojë këtë çështje duke ndërmarrë të gjitha veprimet e nevojshme për kthimin e ligjshmërisë dhe zbatimin e ligjit në përpikëri,” thuhet më tej në reagim.
Në fund, MAShTI shpreh përkushtimin për ruajtjen e rendit ligjor dhe të standardeve akademike në të gjitha institucionet arsimore dhe shkencore duke ftuar komunitetin akademik dhe publikun të qëndrojnë bashkë për mbrojtjen e vlerave institucionale në vend. /Kosovatimes/
