Pasi Shtetet e Bashkuara kryen sulme ajrore ndaj lokacioneve bërthamore të Iranit, Presidenti i SHBA-së Donald Trump ia bëri të qartë kryeministrit izraelit Benjamin Netanyahu se nuk duhen pritur lëvizje të reja ushtarake amerikane, konfirmoi një zyrtar i lartë i Shtëpisë së Bardhë.
Sulmet u kryen të dielën dhe shënjestruan tre centrale bërthamore kryesore iraniane. Menjëherë pas kësaj, Presidenti Trump tha në një bisedë telefonike me Netanyahun se “është koha që lufta të ndalet dhe që të gjithë të kthehen në negociatat diplomatike”.
Sipas zyrtarit, i cili këmbënguli në anonimitet për shkak të ndjeshmërisë së bisedimeve diplomatike, Trump vlerësoi se SHBA-të kanë eliminuar çdo kërcënim të menjëhershëm nga Irani dhe se nuk ka më nevojë për përshkallëzim të mëtejshëm ushtarak.
“Kryeministri izraelit e kuptoi qëndrimin e Presidentit Trump – se Shtetet e Bashkuara nuk duan përfshirje më të thellë ushtarake në situatë”, tha zyrtari i Shtëpisë së Bardhë.
Biseda midis dy udhëheqësve u zhvillua ndërsa Trump ishte duke udhëtuar drejt samitit të NATO-s në Hagë, nga avioni presidencial Air Force One. Zyrtarët e Shtëpisë së Bardhë deklarojnë se Trump ishte “jashtëzakonisht i vendosur dhe i drejtpërdrejtë” në komunikimin e tij me kryeministrin izraelit dhe ia bëri të qartë atij se çfarë nevojitej për të ruajtur armëpushimin aktual.
Sipas të njëjtit burim, Netanyahu e pranoi seriozitetin e situatës dhe i dëgjoi shqetësimet e Trump me vëmendje të plotë.
