Partia Demokratike e Kosovës ka bërë të ditur se ka dorëzuar sot në Gjykatën Themelore në Prishtinë padinë për anulimin e vendimit për liberalizimin e tregut të energjisë elektrike në Kosovë. Thotë se këtë veprim e ka ndërmarrë duke qëndruar besnike ndaj përgjegjësisë për mbrojtjen e interesit publik dhe të drejtat e qytetarëve dhe bizneseve të vendit,
Sipas PDK-së, ky vendim, i marrë në mungesë të një procesi të drejtë, të bazuar ligjërisht dhe gjithëpërfshirës, tashmë ka filluar të prodhojë pasoja të rënda dhe të pakthyeshme për mbi 1,300 biznese vendore dhe mbi 140 mijë punëtorë të këtyre ndërmarrjeve.
“Efektet e këtij vendimi po rrezikojnë seriozisht stabilitetin ekonomik të vendit përmes rritjes së çmimeve, nxitjes së inflacionit dhe kërcënimit për falimentimin e një numri të madh të bizneseve”, thuhet në komunikatën e PDK-së.
