Prokuroria Themelore në Prishtinë, Departamenti për Krime të Rënda, Drejtoria për Hetimin e Krimeve Ekonomike dhe Korrupsionit, njofton opinionin publik se në bashkëpunim me Policinë e Kosovës, është arrestuar një person për falsifikim të parasë.
Përmes një njoftimi për medie Prokuroria Themelore në Prishtinë, Departamenti për Krime të Rënda, Drejtoria për Hetimin e Krimeve Ekonomike dhe Korrupsionit, njofton se në kuadër të detyrave të saj në luftimin e korrupsonit dhe krimit ekonomik, në bashkëpunim dhe koordinim të ngushtë me Policinë e Kosovës, ka arrestuar të dyshuarin L.A. për veprën penale ‘’Flasifikimi i Parasë’’ në bazë të nenit 296 të Kodit Penal të Republikës së Kosovës.
“Gjatë realizimit të kontrollit janë sekuestruar një shumë para të cilat ndërlidhen me veprën penale: 123 fletë formati A4 ku janë të fotokopjuara kartëmonedha prej 10 € dhe 20 €; 12 fletë A4 të prera pasi janë prerë kartëmonedhat; 1 telefon iPhone; 2 x 100€ = 200 €; 108 x 20€ = 2,160 €; 40 x 10€ = 400 €; 23 x 50€ = 1,150 €; 4 x 100€ = 400 €; 5 x 50€ = 250 €; 5 x 20€ = 100 €; 7 x 10€ = 70 €; 11 x 5€ = 55 €. Në total shuma e parave të sekuestruar është 4,796.40 €uro”, thuhet në njoftim.
Bëhet e ditur se ndaj të dyshuarit është caktuar masa e ndalimit prej 48 orësh, ndërsa brenda afatit ligjor prokurori i shtetit do të parashtrojë kërkesë për caktimin e masës së paraburgimit ndaj të pandehurit.
Tutje, prokurori i shtetit njofton se mbetet i përkushtuar në luftimin e kriminalitetit dhe korrupsionit dhe se do të ndërmerr të gjitha veprimet ligjore për parandalimin e këtyre veprave, si dhe dërgimin para gjykatës të secilit kryes të këtyre veprave penale.
