Instituti Albanologjik nëpërmjet një konference për media ka sqaruar opinionin e vet lidhur me kundërshtimet e Ministrisë së Arsimit, Shkencës, Teknologjisë dhe Inovacionit për procesin e emërimit të Meliza Krasniqit si ushtruese e detyrës së drejtorit të këtij institucioni.
Sipas bashkëpunëtorit të lartë shkencor, Naim Berisha, MASHTI dëshiron ta imponojë një draft (konkurs për drejtor), sipas tij, jo ligjor për Institutin Albanologjik, duke shtuar se është e kundërt me atë që kanë Instituti Pedagogjik dhe ai i Historisë.
“MASHTI ka hartuar një draft të bazuar në ligjin për zyrtarët publik dhe strategjinë kombëtare të shkencës. Këshilli Drejtues ka konstatuar se drafti i dërguar nga ministria është në shpërputhje ligjore me bazën e funksionimit tonë”, ka thënë ai.
Adil Olluri, sekretar shkencor, iu është kundërpërgjigjur pretendimit të MASHTI-t se nuk ka pasur kuorum në mbledhjen e emërimit të Krasniqit, duke thënë se me praninë e tij si kryesues në detyrë i Këshillit Drejtues është përmbushur numri i kërkuar.
MASHTI dje ka reaguar dy herë radhazi, duke thënë se vendimi është marrë në mënyrë të njëanshme dhe në kundërshtim me rregulloren e brendshme, duke e vlerësuar juridikisht të pavlefshëm emërimin e Meliza Krasniqit.
“Në përputhje me Rregulloren e Punës së Këshillit Drejtues të Institutit Albanologjik, vendimmarrja e këtij organi kërkon kuorum prej katër anëtarësh, nga gjithsej pesë sa ka Këshilli. Në mbledhjen e datës 20 qershor, ishin të pranishëm vetëm tre anëtarë, prandaj çdo vendim i marrë është juridikisht i pavlefshëm dhe në kundërshtim me rregulloren në fuqi”, kishte thënë MASHTI, që ka paralajmëruar se rasti do të trajtohet përmes Zyrës Ligjore.
