Prokuroria Speciale ka dorëzuar në Gjykatën Themelore në Prishtinë, aktakuzë kundër të pandehurit G.S për veprën penale “shpëlarje e parasë” , në lidhje me nenin 56 paragrafi 1 të Ligjit për Parandalimin e Pastrimit të Parave dhe Luftimin e Financimit të Terrorizmit.
Një gjë të tillë e ka bërë të ditur ky institucion përmes një komunikate për media.
“I pandehurit G.S. akuzohet se duke qenë në dijeni se shuma prej 898,937.84 euro, buron nga veprimtaria kriminale, e ka pranuar dhe menaxhuar këtë pasuri me qëllim të fshehjes apo maskimit të natyrës, burimit, disponimit, lëvizjes apo pronësisë së saj, gjatë periudhës kohore 2019–2023, përmes kontratave fiktive dhe në bashkëkryerje me persona të tjerë të dyshuar jashtë territorit të Republikës së Kosovë”, thuhet në komunikatë.
Në aktakuzë është përfshirë edhe personi juridik “G.S. I.S.”, meqenëse Prokuroria Speciale ka dyshim të bazuar se biznesi është themeluar dhe përdorur nga i pandehuri, me qëllim të qarkullimit të mjeteve dhe maskimit të produkteve të aktivitetit kriminal.
“Prona që është objekt i aktakuzës, e që përfshin pesë parcela tokësore në vlerë prej rreth 355,800.00 euro, me kërkesë të Prokurorisë Speciale, është sekuestruar nga Gjykata dhe është propozuar konfiskimi i saj pas përfundimit të procesit gjyqësor. Prokuroria Speciale i ka propozuar Gjykatës Themelore në Prishtinë, që ndaj personit juridik të shqiptohet dënim me gjobë dhe sanksion penal ‘Pushimi i personit juridik’, ndërsa ndaj të pandehurit të shqiptohet dënim plotësues ‘Ndalimi i ushtrimit të veprimtarisë’, për llojin dhe veprimtarinë që ka ushtruar si person përgjegjës i personit juridik të lartpërmendur”, thuhet tutje në komunikatë.
