Kryeministri në detyrë, Albin Kurti dhe ministri në detyrë, Hekuran Murati, kanë pritur në takim një delegacion të Odës Ekonomike të Gjenevës, të drejtuar nga Kryetari i saj, Vincent Subilia, e të përbërë nga përfaqësues të sektorëve të ndryshëm, si arkitektura, menaxhimi i aseteve, pasuritë e paluajtshme, industria ushqimore, energjia dhe shërbimet juridike.
Qeveria tregon se gjatë takimit, anëtarët e Odës Ekonomike të Gjenevës u njoftuan për trendet ekonomike në Kosovë dhe performancën makroekonomike të vendit.
“Gjatë katër viteve të fundit ekonomia ka shënuar një rritje mesatare vjetore prej 6% të Bruto Produktit Vendor, ndërsa në tremujorin e parë të këtij viti rritja ka qenë 3.6%. Në këtë kontekst, pjesëmarrësit u informuan gjithashtu se Kosova ka marrë për herë të parë një vlerësim kreditor sovran nga agjencia Fitch Ratings me notën BB-, e cila është rikonfirmuar edhe në vitin 2024”, thuhet në njoftimin që qeveria u ka përcjellë medieve rreth takimit.
Më tej, thotë qeveria se mysafirët nga Gjeneva u njoftuan edhe me karakteristikat dhe përparësitë e Kosovës për investime të huaja. “Si kostoja e ulët operative, mosha e re e popullatës, aftësia e fuqisë punëtore për të folur shumë gjuhë, sidomos anglisht dhe gjermanisht, dhe shkathtësitë në sektorin e teknologjisë dhe inovacionit”, thuhet tutje në njoftimin qeveritar.
bëhet e ditur se pjesë e diskutimit ishte edhe roli i diasporës në zhvillimin ekonomik të vendit, ku sipas qeverisë diaspora u paraqit potencial për investime në sektorin e prodhimit, përmirësimin e eksporteve dhe forcimin e brendit kombëtar.
“Në fund të takimit, u diskutuan mundësi të mëtejshme për bashkëpunim konkret ekonomik dhe përfshirja e bizneseve anëtare të Odës Ekonomike të Gjenevës në sektorë të caktuar në Kosovë”, njoftoi qeveria.
