Orkestra Harkore e Operës së Kosovës sonte mban koncertin “Kosova në tinguj” nën dirigjimin e Edon Ramadanit. Adelina Paloja, Kaltrina Miftari, Zana Abazi – Ramadani janë sopranot të cilat do të interpretojnë veprat e njohura shqiptare.
Ushtruesi i detyrës së drejtorit të Operës së Kosovës, Meriton Ferizi, në një intervistë dhënë për RTK-në ka thënë se do të prezantohet program i larmishëm.
“Janë vepra të kompozitorëve shqiptarë në përgjithësi, tingëllojnë shumë bukur. Janë veprat ‘Valsi i Lumturisë’, ‘Baresha’, ‘E kujtoj atë takim’. Janë këngë që s’janë harruar deri sot prej kur janë krijuar”, ka thënë Ferizi në “Mirëmëngjesi Kosovë”.
Ai ka thënë se veprat janë aranzhuar për formacion më të vogël nga kompozitorët Valton Beqiri, Edon Ramadani.
Koncerti mbahet duke filluar nga ora 18:00 në Pallatin e Rinisë në Prishtinë.
