Deputeti i Lëvizjes Vetëvendosje, Glauk Konjufca tha se aktgjykimi i Gjykatës Kushtetuese nuk ka gjetur asnjë shkelje sa i përket votimit të fshehtë në Kuvend.
Në një konferencë për media para tentimit të 38-të për konstituimin e Kuvendit, tha se të gjithë ata që thonë se Avni Dehari e shkeli Kushtetutën përmes votimit të fshehtë, janë lexues të dobët të aktgjykimit të Gjykatës Kushtetuese.
“Ata ose nuk e kanë lexuar vetë, ose e interpretojnë gabimisht, ose e interpretojnë me interpretime të të tjerëve. Gjykata Kushtetuese ka thënë se nuk a kurrfarë klauzole eksplicite që e obligon Kuvendin që patjetër të shkojë deri në pafundësi me votim të hapur, edhe votimi i fshehtë është në të njëjtën kategori për nga legjitimiteti kushtetues, po sikurse votimi i hapur”, deklaroi ai në një konferencë për media.
Konjufca tha se Dehari e propozoi votimin e fshehtë, pas disa dështimeve, duke krijuar përmes logjikës së tij një përfundim racional, se: “edhe të shkonim 100 herë të tjera nuk do të konstituohej në këtë formë Kuvendi i Republikës, dhe pasi e ka ezauruar, se askund nuk shkruan a duhet të provohet 7 herë, 17 apo 100 herë. E ka ezauruar, dhe si kryesues duhet ta kuptoni që i ka kompetencat absolute në këto interpretime që nuk kanë shprehje eksplicite në kushtetutë. Shembull sa herë duhet të provohet për kryetarin e Kuvendit, nuk shkruan askund në Kushtetutën tonë”, tha tutje ai.
Deputeti i Vetëvendosjes deklaroi se aktgjykimi ka treguar se përgjegjësia për konstituimin e Kuvendit i takon të gjithëve, prandaj, tha ai, edhe kreu i LVV-së ka ftuar në takim liderët e partive të shtunën.
Ai ka thënë se nuk mund ta dinë se në çfarë faze mund të hyjë Kosova pas 26 korrikut. “Ne nuk mund ta dimë, mund të spekulojmë. Pashë edhe sot nja 10 interpretime të ndryshme se çka kjo i bije, nga zgjedhjet e reja e deri te asgjë fare, sepse nuk ka ndonjë mekanizëm kushtetues që automatikisht të çon në zgjedhje”, deklaroi Konjufca.
Zyrtari i lartë i LVV-së tha se do të vazhdohet me votim të fshehtë.
“Aktgjykimi sa i përket komisionit për votim të fshehtë nuk ka dhënë kurrfarë konstruksioni që është antikushtetues dhe meqë nuk është kështu, ne nuk mund të kthehemi në një votim për të cilin jemi të bindur që ka dështuar disa herë. Ne duhet t’i japim një epilog kësaj ku jemi tash. Do të ishte antikushtetuese me dal prej kësaj rrugë ku jemi tash, të kthehemi diku ku t’i e ke vërtetuar disa herë që me atë metodë nuk mund të konstituohet Kuvendi”, tha Konjufca në konferencë.
