Imazhet e reja satelitore të regjistruara dje tregojnë rritje të punimeve të ndërtimit dhe gërmimit në uzinën bërthamore Fordo të Iranit, disa ditë pasi bombarduesit e fshehtë amerikanë B-2 hodhën bomba në kompleksin nëntokësor. Pamjet e fundit, të publikuara nga Maxar Technologies, tregojnë makineri të rënda në terren, punë shtesë dhe shenja se hyrjet në tunele mund të jenë mbyllur qëllimisht para sulmit, shkruan Newsweek.
Objekti Fordo, i varrosur brenda një mali 100 kilometra në jug të Teheranit, ishte një nga tre objektet bërthamore iraniane të shënjestruara gjatë Operacionit “Midnight Hammer”, i nisur natën e 21-22 qershorit. Sipas pamjeve, rrugë të reja hyrëse dhe grumbuj krateresh po shfaqen tani rreth kompleksit, veçanërisht pranë hyrjeve kryesore.
Edhe pse vlerësimet fillestare të SHBA-së e përshkruan dëmin nga bombardimi si “jashtëzakonisht të rëndë”, imazhet satelitore të përditësuara sugjerojnë se Irani mund të ketë marrë masa paraprake për të mbrojtur pajisjet e ndjeshme. Media shtetërore iraniane raportoi se objektet bërthamore ishin evakuuar dhe uraniumi i pasuruar ishte zhvendosur “në një vend të sigurt” para sulmit.
Vëzhguesit ndërkombëtarë kanë shprehur shqetësim në lidhje me prodhimin e uraniumit të pasuruar në nivel të lartë nga Irani në Fordo, por nuk dihet se sa kishte mbetur në vend në kohën e sulmit. Analistët thonë se mbushja e tunelit me dhe mund të shërbejë për të mbrojtur pajisjet nëntokësore ose për t’i bërë vlerësimet e mëvonshme të dëmeve më të vështira.
Pamjet e reja tregojnë një makinë për pastrimin e dheut pranë kompleksit të tunelit verior. Buldozerët po lëvizin dheun dhe janë të dukshme edhe shtigje hyrëse të sapo formuara.
