Dhuna në familje nuk ka justifikim dhe askush nuk është mbi ligjin. Kështu ka theksuar ministrja në detyrë e Drejtësisë, Albulena Haxhiu në një postim në Facebook. Ndonëse nuk e ka përmendur me emër, ky reagim i ministres vjen pas raportimeve të mediave se gazetari Valon Syla është ndaluar nga policia për 48 orë me urdhër të prokurorisë nën dyshimin se ka rrahur partneren me të cilën bashkëjetonte.
“Dhuna në familje është akt i papranueshëm që nuk përbën vetëm një shkelje të rëndë ligjore, por edhe një goditje morale ndaj përpjekjeve të përbashkëta për të ndërtuar një shoqëri të sigurt dhe të drejtë për të gjithë. Dhuna në familje nuk është çështje private, është krim, dhe kur ushtrohet nga persona publik, përgjegjësia është edhe më e rëndë. Asnjë pozicion publik, zë mediatik apo influencë nuk mund të shërbejë si mburojë ndaj ligjit dhe llogaridhënies”, ka shkruar ministrja në detyrë e Drejtësisë.
Ajo tutje si koordinatore kundër dhunës në familje, u ka bërë thirrje organeve të drejtësisë të veprojnë me paanshmëri dhe në përputhje të plotë me ligjin.
“Po ashtu, ftoj mediat të tregojnë përgjegjësi profesionale, duke mos heshtur përballë dhunës, por duke e trajtuar këtë fenomen me seriozitet, paanshmëri dhe etikë”, ka shkruar Haxhiu.
