Amerika anuloi vizat e anëtarëve të grupit që bërtitën “Vdekje IDF-së” në koncert

Departamenti Amerikan i Shtetit ka revokuar vizat për anëtarët e grupit britanik punk-rap Bob Vylan pas performancës së tyre në Festivalin Glastonbury, gjatë së cilës ata, së bashku me një pjesë të publikut, brohoritën “Vdekje Ushtrisë Izraelite”.

Incidenti ndodhi të premten, gjatë një performance të transmetuar drejtpërdrejt nga BBC. Një nga anëtarët e dyshes bërtiti nga skena: “Vdekje IDF-së” (Forcat Mbrojtëse Izraelite), së bashku me një numër sloganesh të tjera pro-palestineze.

Policia britanike ka nisur një hetim

Pamjet, të cilat u përhapën shpejt në mediat sociale, treguan turmën duke brohoritur vazhdimisht, ndërsa disa valëvitnin flamuj palestinezë.

Pas reagimeve nga ambasada izraelite dhe zyrtarët e qeverisë britanike, të cilët e dënuan incidentin si “inflamator” dhe “potencialisht kriminal”, policia britanike nisi zyrtarisht një hetim.

“Po shqyrtojmë pamjet filmike për të përcaktuar nëse janë kryer ndonjë vepër penale që kërkon hetim penal”, tha Policia e Avon dhe Somerset.