Shkruan: Rasim SMAJLAJ
Teksa vendi ndodhet në një ngërç institucional të paprecedentë, me plot 38 dështime për ta konstituuar Kuvendin, është e domosdoshme që qytetarët të kuptojnë se ky nuk është një dështim teknik apo procedural – por një dështim politik, i cili bartë pasoja të rënda për funksionimin e shtetit dhe për jetën e secilit qytetar.
Në këtë situatë, përgjegjësia është kolektive, por jo e barabartë. Të gjithë deputetët e Kuvendit janë fajtorë për dështimin në përmbushjen e detyrës së tyre, por barra më e rëndë bie mbi kryetarët e partive, të cilët me llogaritë e tyre personale e ambiciet e pakufishme po e mbajnë peng institucionin më të lartë përfaqësues të qytetarëve.
Sepse, në fund të ditës, kryeministër nuk mund të bëhen të gjithë – por një Kuvend funksional duhet të kemi të gjithë. Të gjithë kryetarët e partive e dinë mirë këtë, por po sillen si udhëheqës klanesh e jo si burra dhe gra shteti.
Ndërkohë, në këtë kaos, po harrohet një e vërtetë e thjeshtë juridike dhe politike: Kryetari apo Kryetarja e Kuvendit nuk është i paprekshëm. Nëse ai apo ajo shkel Rregulloren e Kuvendit, mund dhe duhet të shkarkohet. Nuk mund të kemi një Kuvend të bllokuar për shkak të një individi, qoftë ky edhe në krye të tij.
Ky ngërç nuk është më lojë politike, është abuzim institucional. Populli ka votuar për të pasur përfaqësim, jo teatër pushteti.
Nëse klasa politike nuk gjen guximin për të vepruar tani, nuk do të jetë vetëm Kuvendi që do bjerë në krizë – por vetë besimi në demokracinë tonë.
