Futbollisti portugez, Cristiano Ronaldo, është i magjepsur nga jeta në Arabinë Saudite dhe tha se “i përket vendit” pasi zgjati kontratën e tij me Al-Nassr.
Nuk ishte e qartë se ku do ta vazhdonte Ronaldo karrierën e tij. Më parë kishte spekulime se ai kishte oferta nga vende të tjera dhe madje se mund të luante në Kupën e Botës për Klube për një ekip tjetër. Megjithatë, ai e ka bërë të qartë – do të qëndrojë te Al-Nassr, me një zgjatje kontrate dyvjeçare.
Klubi saudit konfirmoi se Ronaldo nënshkroi një kontratë të re që i siguron atij rreth 185 milionë euro në vit, gjë që e mban atë në fronin e futbollistit më të paguar në botë.
Pasi nënshkroi kontratën, Ronaldo zbuloi se sa i magjepsur ishte nga jeta në Arabinë Saudite. Ai theksoi se “edhe pse është portugez, ai i përket Arabisë Saudite”.
“Jam i lumtur sepse e di që liga është shumë konkurruese. Dua të qëndroj sepse besoj në projekt, jo vetëm për dy vitet e ardhshme, por deri në vitin 2034 kur do të mirëpresim Kupën e Botës në Arabinë Saudite, e cila besoj se do të jetë më e bukura ndonjëherë”, tha Ronaldo.
Portugezi falënderoi Princin Mohammed bin Salman për inkurajimin e rritjes së sporteve në Arabinë Saudite.
“Do të qëndroj edhe për dy vjet si futbollist, por edhe për gjithë jetën sepse kontributi im këtu nuk është për futbollin, por për të gjithë. Dua të jem pjesë e rritjes së këtij vendi. Jam portugez, por i përkas Arabisë Saudite”, shtoi ai.
