Shkruan: Rasim SMAJLAJ
Nesër, në kryeqytetin e Maqedonisë së Veriut, Shkup, komisionerja për Zgjerim e Bashkimit Evropian, Marta Kos, do të vazhdojë raundin e bisedimeve me liderët e gjashtë shteteve të Ballkanit Perëndimor. Në fokus të këtij takimi është Plani Evropian i Rritjes – një iniciativë ambicioze për të përshpejtuar afrimin e rajonit me standardet dhe tregun e përbashkët të Bashkimit Evropian.
Ky plan nuk është vetëm një premtim burokratik i radhës. Ai paraqet një mundësi konkrete për shtetet e rajonit që të përfitojnë nga një fond rreth 6 miliardë euro, i cili synon forcimin e bashkëpunimit ekonomik, ndërlidhjen rajonale dhe implementimin e reformave të domosdoshme për anëtarësimin në BE.
Por pyetja është: a jemi ne si rajon, dhe veçanërisht si Kosovë, të përgatitur për ta shfrytëzuar këtë shans? A do të vijmë në tryezë me një vizion të qartë, me prioritete të koordinuara dhe me vullnetin për t’i lënë pas inatet politike?
Në një kohë kur Evropa ballafaqohet me sfida të reja gjeopolitike dhe kërkon më shumë stabilitet në oborrin e saj të pasmë, Ballkani Perëndimor ka rastin të tregojë se është partner serioz. Takimi i nesërm në Shkup është më shumë se simbolik – është një test i pjekurisë politike, një moment ku retorikat patriotike duhet t’i lënë vendin planifikimit racional dhe integrimit real.
Nëse vazhdojmë të sillemi si të përjashtuar, si të viktimizuar apo si të paorganizuar, do të mbetemi në periferi të historisë evropiane. Nëse ecim bashkë, me përgjegjësi dhe maturi, mund të jemi pjesë e saj.
