Kryetari i Partisë Demokratike, Sali Berisha po merr pjesë në punimet e Asamblesë Parlamentare të OSBE, që zhvillohet në Porto të Portugalisë.
Berisha në fjalën e mbajtur sot para Asamblesë ka theksuar nevojën që Shqipërisë t’i kthehet institucioni i zgjedhjeve të lira, përkundër farsës elektorale, si në diktaturë. Berisha i cilësoi zgjedhjet parlamentare të 11 majit si një farsë zgjedhore, e cila sipas tij vihet në pah edhe në raportin e OSBE-ODHIR.
“Zgjedhjet në Shqipëri ishin një farsë e paralajmëruar. Partitë e qendrës së djathtë në Evropë dhe në mbarë botën, që nga tetori i vitit të kaluar, kanë miratuar njëzëri 5 rezoluta që paralajmëronin atë farsë që do të ndodhte në zgjedhjet e 11 majit në Shqipëri”, u shpreh Berisha.
“Të gjitha potencialet dhe burimet e shtetit u përdorën si instrument elektoral nga partia-shtet. E gjithë struktura qeveritare, të gjitha institucionet shtetërore, u përdorën për të dhënë në ditët e fundit para zgjedhjeve leje ndërtimi, leje legalizimi, certifikata pronësie e shumë shërbime të tjera publike. Partia dhe shteti ishin një, ashtu siç u përmend në raportin paraprak të ODIHR. Kjo është arsyeja pse procesi zgjedhor ishte një farsë e paralajmëruar”, tha Berisha.
Berisha nënvizoi më tej se në vitin elektoral u arrestuan dy liderët kryesorë të opozitës “pa asnjë akuzë penale”.
Kreu i PD-së tha se “kemi vërejtur në shumë e shumë raste trenin bullgar (karusel), votim në grup, komisionerë që votojnë për zgjedhësit etj.”.
Berisha tha se “mendojmë që OSBE është themeluar mbi premtimin dhe detyrimin e vendeve anëtare për respektimin e votës së qytetarëve dhe zhvillimin e zgjedhjeve të lira dhe të ndershme, sipas parimeve dhe standardeve të vendosura në dokumentin e Kopenhagës dhe konventa të tjera. Ne kemi besim të plotë që ky institucion, brenda misionit të tij, do të mbështesë mbajtjen e zgjedhjeve të lira e të ndershme dhe krijimin e mjedisit që çdo parti të jetë në kushte të barabarta gare, dhe media të lirë, votim pa intimidime, ku çdo qytetar të ketë mundësinë e zgjedhjes së lirë”, theksoi Berisha.
Berisha tha se kishte vetëm një kërkesë, “të ndihmoni që kombi im të votojë i lirë”.
“Pa një qeveri teknike, shqiptarët nuk do të kenë mundësi të bëjnë zgjedhje të lira dhe të ndershme”, tha Berisha.
“Ndaj sot, në emër të opozitës shqiptare, kërkoj nga ky institucion i nderuar të mbështesni raportin paraprak të ODIHR dhe së dyti, u bëj thirrje institucioneve ndërkombëtare të ndjekin rekomandimet e shkruara në raportet e fundit të OSBE-ODIHR, që prej vitesh kanë mbetur të pazbatuara”, shtoi Berisha.
