Kreu i PDK-së, Memli Krasniqi, pas takimit me presidenten Vjosa Osmani, ka thënë se kanë rikonfirmuar qëndrimet e tyre politike.
“Rikonfirmova qëndrimin dhe gatishmërinë e PDK-së për të luajtur rolin tonë në gjetjen e një zgjidhje të krizës politike, sidomos që tashmë kemi qartësi nga aktgjykimi i Kushtetueses. Aktgjykimi i ka bërë të qartë rolet e secilit”, ka thënë ai para mediave.
Krasniqi ka thënë më tej se presin që presidentja Osmani t’i informojë nëse “ka ndryshim të kryeneçësisë politike të VV-së”.
“Në radhë të parë, koalicionin e parë e ka detyruar për gjetjen e kompromisit apo konsensusit. Shpresoj që këto konsulta të jenë në funksion të gjetjes së rrugëdaljes. Por mbetet që takimet e tjera që i ka planifikuar presidentja të na qartësojnë a ka apo s’ka ndryshim të kryeneçësisë politike të VV-së dhe Albin Kurtit që po e mbajnë të bllokuar Kuvendin”, ka thënë ai.
Pas Kurtit, Osmani takon edhe Krasniqin
Presidentja Vjosa Osmani, në vazhdën e takimeve me krerët e partive politike, është takuar edhe me kreun e Partisë Demokratike të Kosovës, Memli Krasniqi.
Përpara Krasniqit, Osmani u takua me kreun e LVV-së dhe kryeministrin në detyrë, Albin Kurti.
“Diskutuam gjerë e gjatë. I përmendëm të gjitha elementet përbërëse dhe tash zonja presidente do të ketë takime edhe me përfaqësues të partive të tjera politike, e mbase në fund mund të shohim nëse kemi bërë përparim, sa kemi bërë përparim dhe sa është i mjaftueshëm një përparim i tillë. Besoj se duhet t’i japim shansin edhe takimeve tjera dhe në fund të shohim se cili progresi për të cilin jemi të interesuar që të gjithë”, ka thënë Kurti, pas përfundimit të takimit.
Osmani do të takojë edhe liderin e Lidhjes Demokratike të Kosovës, Lumir Abdixhiku, si dhe kryetarin e Aleancës për Ardhmërinë e Kosovës, Ramush Haradinaj.
