Senatori dhe demokrati amerikan Bernie Sanders foli pas votimit në Senatin amerikan dhe miratimit të ligjit të diskutueshëm të Trump dhe tha se miratimi i këtij ligji do të festohet vetëm nga miliarderët.
Në një fjalim pas seancës së Senatit, Sanders tha se një ligj i tillë do të kontribuojë në pabarazi shtesë në Shtetet e Bashkuara të Amerikës.
“Projektligji që republikanët ‘e shtynë’ në Senat me një votë do të ofrojë triliona dollarë lehtësim tatimor për një përqindëshin më të pasur të popullsisë. Në një kohë pabarazie të paparë në të ardhura dhe pasuri, shumë të pasurit sapo u pasuruan shumë”, tha Sanders.
Ky veprim i republikanëve u konsiderua patetik nga Sanders.
“Është për të ardhur keq që këto lehtësime tatimore për të pasurit po paguhen me shkurtime prej trilion dollarësh në Medicaid dhe Aktin e Kujdesit të Përballueshëm. Rezultati i këtyre shkurtimeve do të jetë që më shumë se 16 milionë amerikanë do të humbasin sigurimin shëndetësor dhe rreth 50,000 do të vdesin si pasojë e kësaj çdo vit. Këto shkurtime do të jenë gjithashtu shkatërruese për spitalet rurale, azilet e pleqve dhe qendrat shëndetësore të komunitetit”, tha ai.
Ai theksoi gjithashtu se ka pasoja shtesë nga miratimi i një ligji të tillë.
“Megjithatë, kjo nuk është e gjitha. Ndërsa shumë të pasurit festojnë në restorante shumë luksoze, ky projektligj shkurton programet e ushqimit për fëmijët e uritur. Për shkak të shkurtimeve në arsim, do të jetë më e vështirë për të rinjtë e klasës punëtore të regjistrohen në kolegj. Për ata që janë të shqetësuar për ndryshimet klimatike, ky projektligj e përkeqëson një situatë shumë të keqe. Ai bën një shkurtim të madh në fondet për efikasitetin e energjisë dhe energjinë e qëndrueshme, ndërsa u jep edhe më shumë përfitime korporatave industrisë së karburanteve fosile”, shpjegoi Sanders.
Së fundmi, senatori kishte një mesazh për të gjithë ata që e miratuan ligjin.
“Republikanët që miratuan këtë projektligj duhet të paguajnë një çmim politik. Duke filluar që tani, ne duhet të punojmë jashtë orarit për të siguruar që këta politikanë të kontrolluar nga korporatat të mposhten në vitin 2026”, përfundoi Bernie Sanders.
