Nga gërmimet e kryera gjatë muajit qershor në sitin arkeologjik Çuka e Ajtoit, në dyshemenë e bazilikës mesjetare u dokumentuan disa varre.
Gërmimet janë kryer nga një projekt shqiptaro-italian në qytetin antik të Çukës së Ajtoit dhe në rrënojat e bazilikës mesjetare në fshatin Çiflig, në bashkinë e Konispolit.
Gërmimet në qytetin antik të Çukës së Ajtoit janë përqendruar në kompleksin e quajtur “Pallati”, ku po dalin të dhëna të rëndësishme arkeologjike për jetëgjatësinë e vendbanimit, si dhe për funksionin e godinave të kompleksit.
DRTK Vlorë, në bashkëpunim me drejtuesit e projektit, dr. Julian Bogdani i Universitetit të Sapienza-s në Itali dhe dr. Nevila Molla e Institutit Arkeologjik në Tiranë, po bashkëpunojnë për gjetjen e zgjidhjeve të mundshme, me qëllim konservimin e monumenteve dhe strukturave arkitektonike të dala nga gërmimet arkeologjike./ata
