Deputeti njëherësh edhe kryetari i AAK-së, Ramush Haradinaj, ka thënë se është e nevojshme të krijohet shumica me 61 vota ose të hapet rruga, në mënyrë që të mos humben këto 30 ditë pa konstituim të Kuvendit, pasi pasojat, sipas tij, janë të mëdha.
“Nëse Kurti i bën 61 veta të zgjedhë kryetarin. Nëse nuk i bën ai na harxhon 30 ditë, na mban peng. Si duket ai ka vendosur t’i harxhojë këto 30 ditë pa e krijuar shumicën”, ka thënë ai.
Për herë të 41-të ka dështuar përpjekja për konstituimin e legjislaturës së nëntë të Kuvendit të Republikës së Kosovës. Në votimin për Komisionin për votim të fshehtë nga deputetët 99 sa ishin në sallë, 54 votuan për, kundër dhe abstenim nuk pati.
Aktgjykimi i Gjykatës Kushtetuese ka obliguar Kuvendin e ri që të konstituohet brenda 30 ditëve nga mbledhja e tij e parë. Megjithatë, që nga publikimi i këtij vendimi më 26 qershor, partitë nuk kanë arritur marrëveshje për zgjidhjen e situatës.
