Pas Partisë Demokratike të Kosovës, edhe Lidhja Demokratike e Kosovës e ka dorëzuar lëndën e saj në Gjykatën Kushtetuese të Kosovës, lidhur me vazhdimet e seancës konstituive të legjislaturës së nëntë të Kuvendit, të mbajtura pas aktgjykimit të Kushtetueses për bllokadën në Kuvend.
Ky subjekt politik i është drejtuar me pyetje kësaj gjykate lidhur me çështjen e Komisionit për votimin e fshehtë për të parin e kuvendit.
Shkëmb Manaj ka thënë se si subjekt politik presin që Gjykata Kushtetuese të vendosë sa më shpejt për këtë lëndë.
“Sot së bashku me kryetaren e Grupit Parlamentar, Hykmete Bajrami dhe deputetin Armend Zemaj, , në emër të Grupit Parlamentar të LDK-së iu kemi adresuar Gjykatës Kushtetuese në lidhje me vazhdimin seancës konstituive të datës 29 qershor. Në vlerësimin tonë vazhdimi i seancave është duke u bërë në kundërshtim të plotë me Kushtetutën e Republikës së Kosovës dhe me konstatimet e nxjerra nga aktvendimi i Gjykatës Kushtetuese”, ka theksuar Manaj para mediave.
Ai tutje ka thënë se iu kanë adresuar Gjykatës Kushtetuese me kërkesën që të sqarohen në mënyrë shteruese të gjitha normat kushtetuese dhe të rregullores së punës së kuvendit, në kuptim të vazhdimit të seancës së kuvendit në pajtim me kushtetutën. “Kjo nënkupton që kryesuesi i seancës duhet të mbajë seancën në pajtim me rendin e ditës të përcaktuar në seancën e parë konstituive, e cila përcaktohet në mënyrë taksative me rregulloren e punës së kuvendit. Nuk ka vullnet politik që mund ta ndryshojë rendin e ditës së seancës sepse kjo është e përcaktuar në rregulloren e punës së kuvendit dhe Gjykata Kushtetuese ka konsideruar që ky akt i nënshtrohet vlerësimit të kushtetutshmërisë”, ka shtuar ai.
Prandaj, ai ka kërkuar me mirëkuptim nga Gjykata Kushtetuese që këtë rast ta trajtojë sa më shpejt që është e mundur, në mënyrë që, siç tha, të kthehet normaliteti në vend dhe të themelohen institucionet e dala pas zgjedhjeve të 9 shkurtit.
“Në këtë rast t’u jepet mundësia secilit deputetë të kuvendit që të votojë për zgjedhjen e kryetarit të kuvendit dhe pastaj për zgjedhjen e nënkryetarëve të kuvendit”, ka thënë Manaj.
