Një nga ngjarjet më të rëndësishme muzikore në Kosovë, Festivali Ndërkombëtar NGOM, nisi edicionin e vitit 2025 mbrëmjen e kaluar në Kalanë e Prizrenit.
Festivali, i cili do të mbahet deri më 6 korrik, do t’u ofrojë adhuruesve të muzikës momente të paharrueshme gjatë katër netëve me një program të pasur muzikor.
Në ditën e parë të festivalit, pjesëmarrës nga qytete të ndryshme të Kosovës përjetuan momente plot entuziazëm së bashku me DJ dhe artistë vokalë që performuan deri në orët e vona të natës. Pjesëmarrësit u shprehën të kënaqur nga atmosfera festive. NGOM Fest, që organizohet që nga viti 2011, këtë vit do të sjellë në skenë artistë të ndryshëm që interpretojnë muzikë Rock, Alternative dhe Elektronike. Në program përfshihen emra si Acer, Mscream, Mak Zøgaj, Sıngı, Buta, Spin by Celina, Dhjetori, Zwada, Shpat Deda, Dren Abazi, Yuko, Uran B., Vera Grace, _C93, Petro Marko, Anıtë, Armen Miran, Secret 47 dhe George Adi. Festivali, që zhvillohet në atmosferën e jashtëzakonshme të Kalasë historike të Prizrenit, vazhdon të japë një kontribut të rëndësishëm në jetën kulturore dhe artistike të Kosovës, duke bashkuar adhurues të muzikës vendas dhe të huaj. Organizatorët kanë theksuar se edhe këtë vit pritet pjesëmarrje e lartë në NGOM Fest.
