Dogana Morinë – Vërmicë është një nga shembujt më të suksesshëm të bashkëpunimit mes Shqipërisë dhe Kosovës, duke lehtësuar ndjeshëm qarkullimin e udhëtarëve dhe duke reduktuar kohën e zhdoganimit për bizneset në të dy anët e kufiri. Kështu ka deklaruar kryeministri i Shqipërisë, Edi Rama.
Pikën kufitare në Morinë e ka vizituar bashkë ministrat e Financave të të dyja vendeve, Hekuran Murati dhe Petrit Malaj.
E Rama ka thënë se kjo vizitë konfirmon angazhimin e përbashkët për rritjen e cilësisë në këtë pikë kufitare.
“Ministri i Financave i Shqipërisë, Petrit Malaj, dhe Ministri i Financave, Punës dhe Transfereve të Kosovës, Hekuran Murati, gjatë një vizite të përbashkët në këtë pikë doganore, konfirmuan angazhimin e përbashkët për rritjen e cilësisë së shërbimit, me qëllim funksionimin 24 orë në 7 ditë të javës dhe eliminimin e çdo vonese në proceset doganore”, ka shkruar Rama në Facebook.
Sipas Ramës gjatë periudhës Janar-Maj 2025, kjo pikë doganore ka përballuar një fluks prej 3 milionë shtetas dhe 1.1 milionë automjete.
