Auditorja e Përgjithshme e Zyrës Kombëtare të Auditimit, Vlora Spanca, ka mbajtur konferencë për medie, me rastin e përfundimit të auditimeve të detyrueshme të rregullsisë financiare dhe pajtueshmërisë për Pasqyrat Financiare Vjetore për vitin 2024.
Spanca ka treguar që janë dhënë 33 konkluzione të pamodifikuara të pajtueshmërisë, 32 janë në nivel qendror, ndërkaq 1 në nivel komunal për Mamushën.
ZKA ka dorëzuar 60 konkluzione të modifikuara, 17 qendrore, 35 lokale dhe 8 për ndërmarrje publike. Gjithashtu janë dhënë 3 konkluzione të kundërta për Komunën e Prishtinës, Malishevës dhe ndërmarrjen publike “Trepça”.
“Për të gjitha këto auditime kemi dhënë 765 rekomandime, prej tyre numri më i madh është dhënë për nivelin lokal prej 413 rekomandimesh, për nivelin qendror 194 rekomandime, si dhe për ndërmarrjet publike janë dhënë 158 rekomandime”, ka thënë ajo.
Spanca ka shprehur kritikat për nivelin lokal, duke thënë se ka pasur kualifikim jo adekuat të shpenzimeve, regjistra jo të saktë të pasurive jofinanciare, nënvlerësim dhe mbivlerësim të obligimeve dhe një sërë parregullsish të tjera.
“Cilësia e raportimit financiar dhe ekzekutimit të buxhetit ende nuk është në nivelin e kënaqshëm. Në raport me vitin e kaluar ka përkeqësim, sidomos në nivelin lokal, ku në nivelin 2023 janë dhënë 23 opinione të kualifikuara jo të mira, në vitin 2024 janë dhënë 31. Kjo do të thotë 31 komuna në rast se aplikohet granti i performancës komunale, do të jenë të diskualifikuara që të përfitojnë nga ky grant”, ka thënë ajo.
