Policia e Rajonit të Prishtinës ka njoftuar se ka arrestuar dy persona të dyshuar për përfshirje në një rast zjarrvënieje që kishte ndodhur më 14 shkurt 2025 në rrugën “Epiri” në Prishtinë, ku ishin shkaktuar dëme të konsiderueshme materiale në një lokal afarist.
Hetimet e zhvilluara nga Njësiti i Hetimeve të Përgjithshme (NjHP) kanë çuar në identifikimin dhe arrestimin e të dyshuarve sot në Shipol të Mitrovicës së Jugut:
“Të dushuarit janë F.S., 36 vjeç, mashkull, shtetas i Republikës së Kosovës dhe M.M., 28 vjeç, mashkull, shtetas i Republikës së Kosovës”, thuhet ne njoftim.
Sipas Policisë, të dy personat dyshohet me bazë të kenë qenë të përfshirë drejtpërdrejt në zjarrvënien e lokalit.
Me vendim të prokurorit të shtetit, të arrestuarit janë dërguar në qendrën e mbajtjes për 48 orë, ndërkohë që hetimet po vazhdojnë për zbardhjen e plotë të rrethanave të rastit.
