Detoksi dixhital është një nga trendet e këtij sezoni dhe udhëtarët po e kërkojnë atë në resortet dhe qendrat turistike të detoksit dixhital, në mënyrë që të shkëputen vërtet nga telefonat, puna dhe stresi i tyre.
Ka shumë arsye pse universi televiziv i serialit “The White Lotus” diskutohet sa herë që transmetohet. Nuk është vetëm vështrimi kritik i jetës së amerikanëve të pasur dhe jo-amerikanëve në një vendpushim luksoz apo intrigat midis personazheve që zhvillohen në episodet e çdo cikli, por edhe komentimi mbi disa nga trendet më të fundit – dhe jashtëzakonisht tërheqëse – në mirëqenie dhe mënyrën se si udhëtojmë.
Ndër trendet që pamë në sezonin e tretë — i cili u shfaq premierë prillin e kaluar — ishte detoksifikimi dixhital. Kur djali i një familjeje të shquar nga Karolina e Veriut kërkoi fjalëkalimin e Wi-Fi-t në resortin luksoz, mentorja e mirëqenies së resortit u përgjigj: “Hoteli është një zonë detoksifikimi dixhital. Ne jemi të përqendruar në të qenit të pranishëm me njëri-tjetrin dhe në kujdesin për veten.” Pas pak trazirash, ajo shtoi: “Është opsionale.” Hoteli kishte tabela ku ndaloheshin celularët, të cilat shfaqeshin kur një mysafir merrte një telefonatë ose mesazh në dhomën e ngrënies, por stafi nuk ndërhyri për të korrigjuar sjelljen.
Pra, disi, trendi i detoksifikimit dixhital iu bë i njohur një audience globale, por sigurisht që nuk u duk si një ide e pabesueshme në mendjet e krijuesve të serialit.
Vetëkontrolli për mirëqenie
Të kalosh kohën jashtë linje është ndër trendet e udhëtimit të vitit 2025. Sipas një ankete nga Hilton Hotels, 27% e 13,000 të anketuarve planifikojnë të zvogëlojnë përdorimin e mediave sociale gjatë pushimeve të tyre këtë vit . Shumë operatorë turistikë, platforma qiraje shtëpish dhe resorte luksoze po shohin gjithashtu një rritje të kërkesave nga mysafirët e tyre që duan të lënë pajisjet e tyre në pritje dhe të rilidhen me veten dhe natyrën, ndërsa gjithnjë e më shumë biznese po përqafojnë praktikat e shkëputjes dixhitale, duke synuar audiencën që kërkon këtë luks.
Tingëllon e lehtë të thuash se dëshiron të shkëputesh nga telefoni yt, por është më e komplikuar nga ç’tingëllon. Të jesh jashtë linje do të thotë të shkëputesh nga llogaritë e tua në mediat sociale, të mos bësh foto të një peizazhi magjik dhe të mos mbështetesh në asnjë aplikacion celular, e lëre më në lojëra . Secili prej nesh përjeton një rrëmujë emocionale kur e lëmë telefonin mënjanë. Zakonet janë të vështira për t’u thyer, veçanërisht kur ato shoqërohen me lëvizje mekanike. Një studim i vitit 2019 nga Universiteti i Greenwich tregoi se në fillim, përdoruesit që morën pjesë në të ndienin ankth dhe bezdi, ndjenja që më vonë ia lanë vendin pranimit, kënaqësisë dhe lirisë nga ndërprerja e lidhjeve dixhitale.
“Vizitorët ndihen të humbur për 24 orët e para, por pas 48 orësh ata janë përshtatur dhe kanë filluar të angazhohen në aktivitete të tjera. Në fund të një qëndrimi tre-ditor, ne zbulojmë se ata mund të jenë të lumtur që u kthehen telefonat ose mund të jenë pak të shqetësuar”, tha për BBC-në Martin Dunford, themelues dhe drejtor ekzekutiv i Cool Places, një faqe interneti që rekomandon hotele, B&B, bare dhe akomodime me vetë-shërbim në të gjithë Mbretërinë e Bashkuar.
Një provë për të gjithë
Gjëja më paradoksale në lidhje me këtë trend është se i drejtohet të gjithëve dhe nuk kushton para; mjafton të shtypësh disa butona për të çaktivizuar lidhjen dhe pajisjen. Megjithatë, duket se udhëtarët modernë janë aq të frustruar me jetën e tyre të përditshme dixhitale saqë janë të gatshëm të paguajnë pak më shumë për t’i shpëtuar. Askush nuk dëshiron t’u përgjigjet mesazheve herë pas here dhe të mos shijojë momentin, as të marrë telefonata nga shefi i tij ndërsa është me leje. Kjo lidhje e vazhdueshme me punën dhe vëlerësimi shoqëror përmes mediave sociale i ka lodhur ata, me detoksifikimin dixhital që nuk është më vetëm një shërbim luksoz në hotele me terma marketingu, por edhe një nevojë më e thellë që të gjithë të rifitojnë kohën e tyre personale, pa ndërhyrje .
Këtë verë, nëse doni të sfidoni veten dhe të detoksifikoheni dixhitalisht pa shpenzuar një pasuri në një resort luksoz, thjesht lini telefonin në një sirtar në dhomën tuaj, shkoni në plazh me një libër dhe lëvizni pa stresin e përgjigjes ndaj mesazheve ose shfletimit të lajmeve negative që do t’ju bëjnë të ndiheni të tmerruar. Është një fillim i mirë.
