Shkruan: Rasim SMAJLAJ
Me zemër të thyer dhe me ndjenjë të thellë revolte e mora lajmin për vdekjen tragjike të Agon Zejnullahut, 27-vjeçar nga Lipjani, i cili ndërroi jetë si pasojë e një ndërhyrjeje të dhunshme nga ana e policisë gjatë një situate të brishtë psikiatrike.
Në një shtet që pretendon të jetë demokratik dhe ligjor, qytetari nuk guxon të humbë jetën nën përkujdesjen e institucioneve. Fatkeqësisht, në vend të ndihmës dhe trajtimit shëndetësor, Agoni u përball me forcë të tepruar, neglizhencë dhe shkelje të rëndë të etikës njerëzore e profesionale.
Kjo nuk është thjesht një tragjedi. Kjo është vrasje me neglizhencë institucionale. Dhe për këtë, nuk mjafton të fajësohet vetëm polici që ishte në skenë – përgjegjësia duhet të shkojë deri te udhëheqësit që krijojnë këtë kulturë të pandëshkueshmërisë.
Thirrja ime publike:
1. Të mos bëhet antifushatë ndaj Policisë si institucion, sepse ka shumë zyrtarë të ndershëm që e mbajnë rendin me përgjegjësi.
2. Por të adresohen me emër dhe mbiemër të gjithë ata policë të pandërgjegjshëm që përdorin uniformën për të shkelur të drejtat e qytetarëve.
3. Të kërkohet përgjegjësi politike nga Ministri i Punëve të Brendshme, Xhelal Sveçla, për mungesën e kontrollit dhe mosveprimin ndaj rasteve të dhunës.
4. Të zbardhen të gjitha faktet me hetim të pavarur dhe transparent, me përfshirjen e organizatave të shoqërisë civile dhe mbrojtjes së të drejtave të njeriut.
Sot është Agoni, nesër mund të jetë dikush tjetër.
Drejtësia nuk kërkon heshtje – kërkon guxim, transparencë dhe përgjegjësi!
