Një person është arrestuar në Pejë nën dyshimin se përmes pakujdesisë ka shkaktuar një zjarr të madh, i cili ka përfshirë rreth 10 hektarë me kulturë gruri, duke shkaktuar dëme të mëdha materiale.
Sipas Policisë së Kosovës, rasti ka ndodhur më 8 korrik 2025, rreth orës 08:45. Në vendin e ngjarjes kanë intervenuar njësitë e zjarrfikësve dhe njësitë policore, të cilat kanë arritur ta lokalizojnë dhe ndalin përhapjen e mëtejshme të zjarrit.
I dyshuari, mashkull kosovar, është intervistuar dhe me vendim të prokurorit është liruar në procedurë të rregullt, ndërsa rasti po trajtohet si “Shkaktim i rrezikut të përgjithshëm”.
Autoritetet kanë bërë thirrje për kujdes të shtuar gjatë sezonit të verës, kur rreziku nga zjarret është i lartë, veçanërisht në zonat bujqësore.
