Prej sot dhe për tri ditë me radhë, sheshi “Zahir Pajaziti” në Prishtinë do të shndërrohet në epiqendër të kulturës botërore me edicionin e radhës të festivalit “NewBorn Prishtina”. Kështu ka theksuar kryetari i komunës, Perparim Rama.
Ky festival ndërkombëtar sjell në zemër të kryeqytetit muzikë, folklor, tradita dhe miqësi nga e gjithë bota.
Në prag të hapjes së festivalit, i pari i Komunës së Prishtinës mirëpriti përfaqësues nga dhjetë shtete: Kanadaja, Kili, Argjentina, Spanja, Guinea, Italia, Polonia, Sllovakia, Bullgaria dhe Turqia. Si shenjë mikpritjeje dhe respekti, atyre iu dhurua një kopje simbolike e “Hyjneshës në Fron” – një ikonë e trashëgimisë kulturore të Kosovës.
“Festivali “NewBorn Prishtina” synon të ndërtojë ura mes popujve përmes kulturës dhe artit, duke e bërë Prishtinën një pikëtakim të vlerave universale dhe një nikoqire krenare të diversitetit kulturor”, ka shkruar Rama në Facebook.
