Shkruan: Florim ZEQA
Edhe pse kanë kaluar pesë muaj nga zgjedhjet e fundit parlamentare, në qytetet e Kosovës ende janë prezentë posterët e politikanëve, të atyre që i morën votat dhe u futen në Kuvend, por edhe të atyre që nuk arritën t’i shijojnë privilegjet e një legjislature të pakonstituuar!
Ngufatje e hapësirave publike me figura të urryera nga qytetarët
Jam në përfundim të muajit të dytë të pushimeve në vendlindje. Nga do që po shkoj po kënaqem dhe po zhgënjehem njëkohësisht. Kënaqësinë ma dhurojnë sjelljet e njerëzve të mirë dhe atdhetarë, kurse “zhgënjimi” më vjen nga posterët e mbetur të politikanëve në vendet publike të qyteteve tona, prezenca e të cilëve është një hyrje, kudo në brendi dhe në dalje të qyteteve tona!
Prezenca e posterëve të figurave politike, e atyre që edhe pesë muaj pas zgjedhjeve nuk po arrijnë ta konstituojnë organin ligjvënës, përveçse irrituese për syrin e qytetarëve, paraqet torturë psikike për rreth 900 mijë votues kosovarë, të cilët, në radhë të parë kanë votuar për mirëqenien e tyre dhe perspektivën zhvillimore të vendit, por jo për privilegjet e një grupi të vogël politikanësh që e kanë zënë peng Kuvendin e Kosovës për kalkulime personale!
Kjo klasë e papërgjegjshme e politikanëve, tashmë deputet në Kuvendin e Kosovës, që përveç pagave të majme mujore, i përfitojnë edhe mëditjet po ashtu të majme (të barasvlershme me pagën minimale në vend) për 2-3 minuta të qëndrimit pasiv në ulëset e tempullit të demokracisë!
Zhvendosja nga politika drejt perspektivës zhvillimore
Tema e sotme nuk janë dëmet që po i shkaktojnë buxhetit të shtetit deputetët e një legjislature të pakonstituar, por prezenca e tyre vizuale në hapësirat publike të qyteteve tona.
Secili qytetarë apo edhe mërgimtarë që i vëren posterët e deputetëve bllokues të institucioneve shtetërore në vendet publike të qyteteve tona nuk mund ta ndjejë veten mirë!
Ka edhe të atillë që ndjejnë edhe simpati për disa nga figurat e parlamentit të pakonstituuar, por shumica prej tyre ofshajnë dhe mallkojnë deri në ‘kupë të qiellit’, duke u betuar para fotove të tyre: “Më nuk do t’ju votojmë”!
Në të gjitha vendet demokratike, por edhe të rajonit është e rregulluar me ligj ‘koha e vendosjes dhe e heqjes së posterëve të kandidatëve për deputet’, përveç në Kosovën e paradokseve të mëdha, ku nuk funksionon Ligji dhe as Kanuni (ligjet zakonore)!
Në fakt, janë të fortët e politikës që e bëjnë ligjin në këtë vend. Ashtu siç e kanë bllokuar konstituivin e Kuvendit, e kanë ngufatur funksionimin e sistemit të drejtësisë dhe të jetës institucionale në Kosovë.
Logjika e të menduarit pozitiv e shtron nevojën e largimit e të gjithë posterëve nga zgjedhjet e kaluara, për t’ua liruar frymëmarrjen qytetarëve të zhgënjyer në këta deputet, të cilët vetëm për pesë muaj u bën sinonim i së keqes, bllokues të Kuvendit dhe zhvatës të buxhetit të shtetit pa e bërë asnjë punë të mirë për vendin dhe qytetarët.
Në vend të posterëve të politikanëve, të vendosen poster të produkteve vendore, poster të vendeve turistike dhe arkeologjike, poster të florës dhe faunës, pse jo edhe të figurave të shkencës dhe kulturës që na bëjnë krenar që jemi shqiptarë.
