Një shtetas i Maqedonisë së Veriut është ndaluar mbrëmjen e së shtunës në pikën kufitare Hani i Elezit, pasi në veturën që po drejtonte u zbuluan mijëra monedha të dyshuara si të falsifikuara.
Sipas njoftimit zyrtar të Policisë së Kosovës, rreth orës 21:15, në kuadër të kontrolleve rutinore, zyrtarët doganorë dhe policorë kanë selektuar për kontroll të detajuar një veturë të tipit Audi A2, ngjyrë e gjelbër metalike, me targa të Maqedonisë së Veriut. Automjeti po drejtohej nga një shtetas me inicialet S.Xh., i lindur më 1981 në Shkup.
Gjatë kontrollit të detajuar, në pjesë të fshehura nën ulëset e përparme të veturës, janë gjetur disa qese plastike të mbushura me monedha metalike prej 2 frangash zvicerane. Sipas autoriteteve, dyshohet se këto monedha janë të falsifikuara.
“Në vendngjarje kanë dalë njësitet relevante të policisë, përfshirë ekipet e hetuesisë, të cilat pas inventarizimit të parë kanë konstatuar se bëhet fjalë për gjithsej 8,076 monedha, me vlerë të përgjithshme prej 16,152 franga zvicerane”, thuhet në komunikatën e Policisë së Kosovës.
I dyshuari është ndaluar për 48 orë me urdhër të Prokurorit për Krime të Rënda dhe ndaj tij është iniciuar rasti penal për veprën “Falsifikim i parasë”. Monedhat e dyshuara dhe automjeti janë sekuestruar dhe rasti është proceduar më tej në njësinë rajonale të hetimeve.
Autoritetet kanë ritheksuar përkushtimin e tyre për të luftuar veprimtaritë ilegale në zonat kufitare, veçanërisht ato që kërcënojnë sigurinë publike dhe sistemin financiar.
“Policia e Kosovës, në bashkëpunim të ngushtë me Doganën e Kosovës, mbetet e përkushtuar në parandalimin dhe luftimin e të gjitha formave të kriminalitetit ndërkufitar”, theksohet tutje në komunikatë.
