I emëruari nga presidenti i Shteteve të Bashkuara si i dërguar për misione të veçanta, Richard Grenell, ka thënë se presidentja e Kosovës, Vjosa Osmani, ka manipuluar fjalët e presidentit amerikan, Donald Trump.
Në një status në rrjetin social X ku e ka etiketuar edhe presidenten Osmani, Grenell ka thënë se është turp, sipas tij, për Osmanin që manipuloi fjalët e Trump-it.
“Turp për Vjosa Osmanin që manipuloi fjalët e presidentit Donald Trump. Donald Trump u nominua për Çmimin Nobel për Paqen për punën e tij në paqen dhe normalizimin ekonomik midis Kosovës dhe Serbisë në vitet 2019 dhe 2020 – përmes nënshkrimit të Marrëveshjes së Washingtonit nga Trump në Zyrën Ovale në Shtëpinë e Bardhë. Osmani nuk ishte pjesë e asaj marrëveshjeje. Dhe të pretendosh sikur kishte diçka të re është absurde”, ka shkruar Grenell.
Presidentja Vjosa Osmani, gjatë qëndrimit në Shtetet e Bashkuara në disa deklarime publike ka thënë se presidenti Donald Trump ka parandaluar së voni një përshkallëzim të situatës nga Serbia në Kosovë. Madje, sipas saj, kjo nuk ka të bëjë me vitet 2023 e as 2020, por “për zhvillime shumë të vona”, kishte thënë Osmani.
