Gjykata Themelore në Prishtinë në rigjykim i ka shpallur fajtorë dhe i ka dënuar me nga një vit burgim në rastin “Veteranët”, ish-kryeministrin Agim Çeku, Sadik Halitjahën, Shkumbin Demalijajn, Qelë Gashin, Shukri Bujën, Ahmet Dakun, Rrustem Berishën, Faik Fazliun, Fadil Shurdhajn dhe Xhavit Jasharin për veprën penale “Keqpërdorim i detyrës apo autoritetit zyrtar”, nga neni 422 i Kodit Penal të Republikës së Kosovës. Ndërkohë të akuzuarit Nuredin Lushtaku e Smajl Elezaj janë liruar nga akuzat.
Aktgjykimi u shpall sot nga kryetari i trupit gjykues, Gazmend Bahtiri, i cili tha se Gjykata në bazë të dispozitave të akuzuarit i gjykon me dënim me burgim secilin veç e veç në kohëzgjatje prej një viti i cili dënim, tregoi ai, do të fillojë së ekzekutuari në afat prej 15 ditësh pasi aktgjykimi të marr formën e prerë.
“Obligohet Qeveria e Kosovës që të formojë komisione përkatëse që në procedurë administrative të bëjë rishqyrtimin e listës prej 19 mijë e 500 personave, aplikues veteranë-luftëtarë si në shtojcën e aktakuzës së Prokurorisë Speciale, në afat prej një viti, pasi aktgjykimi të marrë formën e prerë”, thuhet në aktgjykim që e lexoi kryetari i trupit gjykues, Gazmend Bahtiri.
Ndërsa, të akuzuarit Nuredin Lushtaku dhe Smajl Elezaj, janë liruar nga akuza. “Për shkak se nuk është provuar se të akuzuarit kanë kryer veprën penale “Keqpërdorim i pozitës apo autoritetit zyrtar”, meqë të njëjtit nuk e kanë pasur asnjëherë cilësinë e personit zyrtar”, tha Bahtiri teksa e lexonte aktgjykimin.
Kryetari i trupit gjykues tha se pas administrimit të provave personale e materiale është vërtetuar se të akuzuarit për pjesën fajësuese, përtej dyshimit të bazuar, është vërtetuar se të njëjtit kanë kryer veprën penale me të cilën janë akuzuar në aktakuzë. Ndërsa sa i përket dy të akuzuarve të tjer, Nuerdin Lushtaku dhe Smajl Elezaj, nuk e akne pasur cilësinë e personit zyrtar.
Bahtiri, shtoi se Gjykata nuk ka mundur të verifikojë- identifikojë secilin person i përfshirë në listën shtesë prej 19 mijë e 500 personash për të cilët është marr vendim për njohjen e statusit të veteranit të luftës së UÇK-së, nga komisioni.
“Gjykata vlerëson se shqyrtimi i vlefshmërisë së këtij statusi duhet t’i nënshtrohet një procesi të ri ligjor të rregullt administrativ, ashtu që komisioni i ri duhet të shtojë përmbushjen e kushteve ligjore për njohjen e statusit të veteranit të luftës së UÇK-së, për secilin kandidat në përputhje me ligje dhe akte nënligjore përkatëse, duke garantuar transparencë dhe të drejtën e ankesës. Qeveria pas përfundimit të shqyrtimit nga ky komision të marr vendim përfundimtar për vlefshmërinë ose jo të statusit të secilit person nga kjo listë mbi bazën e vlerësimit të ligjshmërisë individuale”, tha kryetari i trupit gjykues gjatë leximit të aktgjykimit.
