Katër zyrtarë policorë në dy raste të ndara, i ka rekomanduar t’i pezullojë Inspektorati Policor, Policisë së Kosovës.
Rasti i parë, siç bëhet e ditur në njoftimin për media të IPK-së, ka të bëjë me një incident të ndodhur një natë më parë, ku dyshohet të jetë përfshirë zyrtari policor, jashtë detyrës zyrtare.
“Lidhur me rastin e parë fillimisht Policia e Kosovës kishte pranuar informacion mbrëmë (13.07.2025) për një incident në një fshat të Ferizajt ku dyshohej se një i mitur ishte sulmuar dhe kanosur me armë nga një person me rroba civile e që është prezantuar si zyrtar policor. Njësitet policore kanë dalë në vendin e ngjarjes kurse më vonë personi i dyshuar është identifikuar si zyrtar policor (jashtë detyrës zyrtare) dhe i njëjti është vet-paraqitur në stacion policor pas incidentit”, thotë IPK që ka treguar se rasti në fjalë do të trajtohet në procedurë të rregullt në koordinim me Prokurorinë Themelore në Ferizaj me dyshimin për veprën penale “Lëndim i lehtë trupor”.
Rastin tjetër, thotë IPK-ja ka të bëjë me dyshimet për përfshirjen e tre zyrtarëve policor në një incident në rrugën, “Muharrem Fejza” në Prishtinë, të ndodhur para mesnatës së 30 qershorit.
“IPK në interes të hetimit ka rekomanduar suspendimin për tre zyrtarë policorë kurse incidenti ku dyshohet se janë të përfshirë si të dyshuar zyrtarët raportohet të ketë ndodhur para mesnatës më 30.06.2025 në rrugën “Muharrem Fejza” në Prishtinë. Hetimet lidhur me këtë rast ndaj tre zyrtarëve policorë janë duke u zhvilluar në koordinim me Prokurorinë Themelore në Prishtinë në procedurë të rregullt më dyshimin për veprën penale “Keqtrajtim gjatë ushtrimit të detyrës zyrtare ose autorizimeve publike”, bëhet e ditur në njoftim.
Kanë thënë se hetuesit e IPK-së në konsultim të vazhdueshëm me prokurorinë pritet të ndërmarrin edhe veprime të tjera hetimore lidhur me këtë rast për të sqaruar rrethanat e dy rasteve.
