Drejtori i Përgjithshëm i Policisë së Kosovës, kolonel Gazmend Hoxha, së bashku me stafin e lartë menaxhues, pati sot një takim zyrtar me drejtorët e Drejtorive Rajonale Policore dhe me komandantët e stacioneve policore të Policisë së Kosovës.
Sipas njoftimit, qëllimi i këtij takimi ishte që përveç prezantimit dhe analizimit të raportit të gjashtëmujorit të parë të vitit 2025, ku u pasqyruan të arriturat dhe rezultatet pozitive, të diskutohen edhe çështjet që ndërlidhen me performancën në punë, integritetin, disiplinën dhe rritjen e mëtejmë të profesionalizmit policor, e që ndikon direkt edhe në imazhin pozitiv dhe besueshmërinë ndaj Policisë së Kosovës.
“Drejtori i përgjithshëm i PK-së, nga drejtorët rajonal, komandantët e stacioneve, por edhe nga të pranishmit kërkoi që të zbatohen në përpikëri, me profesionalizëm dhe integritet të gjitha procedurat e parapara ligjore, udhëzimet dhe rregulloret policore, si dhe synimet, detyrat dhe objektivat strategjike policore me theks të veçantë:rritjen e bashkëpunimit dhe qasjes më proaktive me komunitetin, rritjen e bashkëpunimit dhe komunikimit të mirëfilltë me qytetarët, rritjen e performancës, integritetit, mbikëqyrjes më efikase dhe disiplinës në punë nga eprorët,parandalimin, hetimin dhe zbulimin e veprimtarive kriminale dhe luftën kundër korrupsionit, uljen e shkallës së krimit të të gjitha formave, ngritjen e sigurisë në trafik dhe parandalimin e aksidenteve, ofrimin e sigurisë ndaj të gjithë qytetarëve pa dallim dhe ruajtjen e rendit kushtetues”, njofton Policia e Kosovës.
Ndër të tjera drejtori Hoxha theksoi se përmes zbatimit të ligjit, menaxhimit sa më efikas të burimeve njerëzore dhe atyre logjistike, mbikëqyrjes së performancës së zyrtarëve policorë nga eprorët e drejtpërdrejtë, mund të arrihen rezultate edhe më pozitive në shumë sfera policore.
Bëhet e ditur se në këtë takim të gjithë të pranishmit u zotuan për angazhime të mëtejme me qëllim të përmbushjes së detyrave dhe obligimeve policore, të cilat janë në interes të qytetarëve dhe të vendit.
