Presidentja Vjosa Osmani, nuk ka komentuar deklarimin e të emëruarit për misione të veçanta të presidentit të SHBA-ve, Richard Grenell, për ashtu siç e ka quajtur ai, “manipulimin me fjalët e presidentit Donald Trump”.
Ajo ka thënë se është përgjigjur për mënyrën se si i ka kuptuar deklarimet e Trump dhe vetëm ka shprehur vlerësim pozitiv për to.
“Kur jam përgjigjur në lidhje me këtë deklarata shumë konkrete, s’kam interpretuar, por e kam treguar si e kam kuptuar unë si presidente e Republikës së Kosovës…Ne e vlerësojmë rolin e presidentit Trump si paqebërës dhe tërë deklarata ime ka qenë në tentim të vlerësimit pozitiv të tij”, ka thënë Osmani në konferencë për media.
Ajo ka falënderuar rolin e Trump për paqeruajtjen globale, teksa ka detajuar deklarimet me data specifike.
“Unë jam përgjigjur në pyetje dhe pyetja ka qenë për deklaratat e kohëve të fundit. Janë deklarata e datës 25 qershor 2025, në atë deklaratë thuhet ‘Ju e dini se javët e fundit u kujdesëm për Indinë, Pakistanin, Kosovën e Serbinë’. Pastaj jam pyetur për një deklaratë shumë konkrete, njëra nga të cilat është dhënë në një takim të kabinetit dhe ajo ka qenë me 27 qershor 2025. Në atë deklaratë thuhet se ‘Brenda pak muajsh kemi arritur paqen në mes të Indisë, Pakistanit, Izraelit dhe Iranit, Republikës së Kongos dhe Ruandës dhe gjithashtu disa të tjera. Siç e dini Serbia ishte gati të shkonte në luftë dhe ne e kemi ndalur një gjë të tillë’. Një deklaratë thotë brenda disa javësh, një brenda disa muajsh”, ka thënë Osmani, teksa ka bërë ftesë publike për dëgjimin e deklaratave.
Ajo ka përmendur edhe deklaratën tjetër të datës 8 gusht ku emisari amerikan, Richard Grenell ka shkruar se presidentja e Kosovës, ka manipuluar me fjalët e presidentit DonaldTrump, duke iu referuar një deklarate të saj se Trump së fundmi ka parandaluar një përshkallëzim të mundshëm të situatës nga Serbia në Kosovë.
“Turp për Vjosa Osmanin që manipuloi fjalët e presidentit Donald Trump. Donald Trump u nominua për Çmimin Nobel për Paqen për punën e tij në paqen dhe normalizimin ekonomik midis Kosovës dhe Serbisë në vitet 2019 dhe 2020 – përmes nënshkrimit të Marrëveshjes së Uashingtonit nga Trump në Zyrën Ovale në Shtëpinë e Bardhë. Osmani nuk ishte pjesë e asaj marrëveshjeje. Dhe të pretendosh sikur kishte diçka të re është absurde”, kishte shkruar Grenell në X.
