Në Dhomat e Specializuara në Hagë, të enjten përfunduan dëshmitë dy dëshmitaret e mbrojtësit të viktimave, të cilat për dy ditë radhazi iu përgjigjen pyetjeve të trupit gjykues, avokatëve e prokurorisë.
Ato folën për raportin e përgatitur për gjendjen psikike e psikiatrike të viktimave të çështjes në rastin ndaj Hashim Thaçit, Kadri Veselit, Jakup Krasniqit dhe Rexhep Selimit.
“Nëse konstatimet tuaja nuk mund të quhen të vlefshme nga pikëpamja mjekësore, atëherë çfarë relevance ka kjo literaturë që keni përdorur ju”, ka thënë Furtuna Sheremeti, avokate e Rexhep Selimit
“Ne jemi specialiste të fushës së mjekësisë, ne nuk mund të flasim për vlerën e përmendjes së simptomave në këtë proces ligjor, në kontekstin ligjor por nga pikëpamja mjekësore, këto simptoma që përmenden në këtë proces kanë vlerë dhe përputhen me atë çka dihet nga literatura ekzistues apo nga ekspertiza përkatëse. Ne nuk mund të themi që simptomat janë domosdoshmërisht pasojë e torturës apo e trajtimit çnjerëzor. Nuk është kjo detyra jonë”, ka deklaruar Karin Duhne-Prinsen, psikologe
“Unë po e shoh këtë nga pikëpamja mjekësore se për këtë pikëpamje jam këtu, unë këto simptoma me probleme psikologjike që diskutuam si rregull do ti shihja tek personat, të konstatoja te personat që janë viktima të keqtrajtimit apo rrëmbimit”, ka thënë Chatherine Nicola-Black, psikiatre .
Pas dëshmitarëve të prokurorisë dhe mbrojtësit të viktimave, tani në gjykatë do të vijnë dëshmitarët e mbrojtjes së të akuzuarve. Për këtë, mbrojtja e Thaçit dhe e Krasniqit kanë njoftuar se do të thërrasin dëshmitarë dhe do të dorëzojnë prova, ndërsa ajo e Veselit dhe Selimit nuk planifikojnë të thërrasin dëshmitarë në gjyq.
Të martën më 22 korrik në Hagë do të mbahet konferenca e radhës mbi ecurinë e çështjes, pas së cilës gjykata do të hyjë në pushim veror. Gjykata do ta rifillojë punën më 19 gusht me konferencën përgatitore të mbrojtjes, pas së cilës pritet të fillojnë dëshmitarët e të akuzuarve.
