Përfaqësuesi i SHBA-së në Siri, Tom Barrack, tha të shtunën në mëngjes se Izraeli dhe Siria kishin rënë dakord për një armëpushim pas ndërhyrjes së Izraelit këtë javë në luftimet midis forcave qeveritare siriane dhe grupeve të armatosura rivale.
Njoftimi erdhi pas shpërthimit të përleshjeve të reja midis grupeve druze dhe fiseve beduine, dhe presidenti i Sirisë tha se do të dërgonte trupa përsëri për të shuar luftimet.
Dhjetëra mijëra njerëz janë zhvendosur si pasojë, duke krijuar një krizë të rëndë humanitare.
Në një deklaratë të postuar në platformën sociale X, Barack tha se armëpushimi i ri midis Izraelit dhe Sirisë u mbështet nga Turqia, Jordania dhe vendet e tjera fqinje.
“U bëjmë thirrje druzëve, beduinëve dhe sunitëve që të ulin armët dhe të ndërtojnë një identitet të ri dhe të unifikuar sirian me pakicat e tjera në paqe dhe prosperitet me fqinjët e tyre”, tha ai.
Duhet të kujtojmë se përleshjet filluan të dielën midis fiseve druze dhe fiseve lokale beduine myslimane sunite në provincën jugore siriane të Sweidës.
Forcat qeveritare ndërhynë, nominalisht për të rivendosur rendin, por në fund u rreshtuan me beduinët kundër druzëve.
Izraeli ndërhyri në mbrojtje të druzëve, duke nisur dhjetëra sulme ajrore ndaj konvojeve të luftëtarëve qeveritarë dhe madje edhe ndaj selisë së Ministrisë së Mbrojtjes siriane në Damask qendror.
Druzët formojnë një komunitet të rëndësishëm në Izrael, ku shihen si një pakicë besnike dhe shpesh shërbejnë në ushtrinë izraelite.
