Një mashkull kosovar është arrestuar dje në Kosovë si i dyshuar lidhur me rastin e sekuestrimit të disa armëve nga autoritetet kroate në kufirin Serbi-Kroaci, më 4 qershor 2025.
“Gjilan 04.06.2025 – 17:50. Më 18.07.2025 pas hetimeve të zhvilluara nga Sektori i Hetimeve të Departamentit të Policisë Kufitare është arrestuar një mashkull kosovar, si i dyshuar lidhur me gjetjen dhe sekuestrimin e disa armëve nga autoritetet e Kroacisë në Kufirin Serbi-Kroaci më 04.06.2025. I dyshuari me vendim të prokurorit është dërguar në mbajtje”, thuhet në njoftim.
Sipas raportimeve të mediave kroate, më 4 qershor 2025, në pikën kufitare Tovarnik, autoritetet kroate kanë ndaluar një automjet me targa të Kosovës që po udhëtonte drejt Zvicrës. Gjatë kontrollit, janë gjetur dhe sekuestruar 11 pushkë automatike dhe municion.
Me këtë rast, janë arrestuar dy shtetas të Kosovës, një 45-vjeçar dhe një 42-vjeçar, të cilët dyshohet se i kishin siguruar armët dhe municionin në mënyrë të paligjshme, me qëllim që t’i kontrabandonin përmes Kroacisë në një shtet të Bashkimit Evropian.
“Pas përfundimit të hetimit penal, të dy të dyshuarit janë dërguar në paraburgim pranë Policisë së Qarkut Vukovar-Srijem, dhe ndaj tyre është ngritur kallëzim penal në Prokurorinë kompetente shtetërore”, ka njoftuar policia kroate.
